यता बिजुली झलमल्ल, उता कुलमान अलमल्ल

सरकारले नेपाल विद्युत् प्राधिकरणका प्रवन्ध निर्देशक कुलमान घिसिङलाई बर्खास्ती गरेकै दिन अर्थात् फागुन २४ गते उनी मकवानपुरको चेपाङ बस्तीमा थिए । पञ्चैबाजासहित राक्सिराङ गाउँपालिकाका अध्यक्ष, पूर्व राज्यमन्त्री, पूर्व सांसद तथा संविधानसभाका सदस्यहरू घिसिङलाई स्वागत गर्दै थिए ।

सोही दिन मन्त्रिपरिषद् बैठक बस्दै थियो । बागमती प्रदेशका पूर्वसांसद ओमबहादुर ग्लानले मन्तव्य ब्यक्त गर्दै भनेका थिए, ‘आजै बैठक बस्दै रहेछ, अप्रिय निर्णय नहोस् ।’ राक्सिराङ गाउँपालिका–९ लाई पूर्ण बिजुलीबत्तीयुक्त घोषणा गरेर साँझ फर्कंदै गर्दा बाटैमा बर्खास्तगीको समाचार सार्वजनिक भएको थियो ।

तत्कालीन नेपाल कम्युनिष्ट पार्टी–नेकपाको सरकार हुँदा ‘चेपाङलाई उज्यालो कार्यक्रम’ सञ्चालन गर्न चेपाङ बाहुल्य क्षेत्र मानिएको कैलाश र राक्सिराङ गाउँपालिकाका प्रमुखसहितको टोलीले कुलमानलाई आग्रह गरेको थियो । सोही आग्रहमा जोडबल गर्दै पूर्वस्वास्थ्यमन्त्री विरोध खतिवडाको समेत पहलकदमीबाट ‘चेपाङलाई उज्यालो कार्यक्रम’ लागू गरिएको हो । चेपाङलाई उज्यालो कार्यक्रमअन्तर्गत राक्सिराङ गाउँपालिकाका अधिकांश वडामा फलामे बिजुली पोल र इन्सुलेसनसहितको तार बिस्तार गरिएको गाउँपालिका अध्यक्ष राजकुमार मल्लले बताए ।

गाउँपालिकालाई पूर्ण विद्युतीकरण गर्ने अभियान अझै सफल भइसकेको छैन । ५ हजार घरधुरीमध्ये अझै १५ सयमा विद्युत् पु¥याउन बाँकी रहेको मल्लको भनाइ छ । घिसिङलाई चेपाङ बस्तीमा ल्याएर हल्लाखल्ला गरिएको र सोही दिन उहाँको बर्खास्ती भएको समाचारपछि स्थानीय सरकार पनि दुखित छ । ‘उहाँ हुँदा हामीलाई काम गर्न सजिलो भएको थियो, सरकारको निर्णय प्रिय लागेन’, अध्यक्ष मल्लले भने ।

अझै अन्य गाउँबस्तीमा बिजुली बत्ती बाल्ने अभियानलाई जारी राख्ने मल्लले बताए । उनी दोस्रो कार्यकालका लागि राक्सिराङ गाउँपालिकाको अध्यक्षमा निर्वाचित भएका व्यक्ति हुन् ।