जिउँदालाई नछाड्नेले मरेकालाई के राख्थे बाँकी

‘जिउँदो हुँदा सताउने, मरेपछि घरपरिवारलाई कन्याउने को हो ?’ गाउँखाने कथाको सही उत्तर हो, वैदेशिक रोजगार कार्यालयको बिमा शाखामा कार्यरत पशुपति अधिकारी । स्थानीय बिचौलियासँग मिलेर वैदेशिक रोजगारीमा ज्यान गुमाएका व्यक्तिको परिवारलाई दिनुपर्ने बिमा रकममा घोटाला गरेको पोल खुलेपछि यो गाउँ खाने कथा जन्मिएको हो ।

अधिकारीले विदेशमा ज्यान गुमाउने नेपाली कामदारको परिवारसँग २० देखि २५ हजार रूपैयाँ काम गरिदिएबापत घुसका रूपमा असुल्दै आएका थिए । वैदेशिक रोजगारीमा गएकाको मृत्यु हुँदा पीडित परिवारलाई वैदेशिक रोजगार बोर्डले बिमा तथा सहयोग रकम उपलब्ध गराउँदै आएको छ ।

बिमाबापत १४ लाख र वैदेशिक रोजगार बोर्डको ७ लाख रूपैयाँ गरी २१ लाख रूपैयाँ पीडित परिवारले पाउने व्यवस्था छ । तर अज्ञानता र अशिक्षाका कारण स्थानीय बिचौलियाको मिलिभगतमा पीडित परिवारलाई १२ देखि १४ लाख रूपैयाँसम्ममात्र उपलब्ध गराउँदै आएको छानबिनबाट खुलेको छ ।

स्थानीय बिचौलियाले अधिकारीसँग मिलेर ‘अनलाइन पे’ प्रणालीलाई बाइपास गर्दै चेक लिने गरेका छन् । उनीहरूले कर्मचारीले झन्झट दिने बहानामा पीडित परिवारसँग बिमा रकम दावी लिनको लागि मञ्जुरीनामा सहित खाता नम्बर लिने र खाली चेकमा ल्याप्चे सही छाप गराएर आफैंसँग राख्ने, त्यसपछि अधिकारीसँग मिलेर रकम निकासा गर्दै १२ लाख रूपैयाँ दिने गरेका छन् ।

बोर्डको प्रणालीलाई बाइपास गरेबापत अधिकारीले भने प्रतिव्यक्ति २० देखि २५ हजार रूपैयाँ बिचौलियाबाट घूसवापत लिने गरेका थिए । बिचौलियाहरूले यसैको फाइदा उठाउँदै लाखौं रकम खाएका छन् । दुबईमा मृत्यु भएका एक जना यादव थरका श्रमिककी पत्नीले १० लाख रूपैयाँ मात्रै बिमाबापत पाएको गुनासो वैदेशिक रोजगार बोर्डमा गरेपछि अधिकारीलाई पक्राउ गरी छानबिन अघि बढाइएको छ ।