राजमार्गमा गाँजा ओसार्नेहरु सशस्त्रको फेला
ठूलो परिमाणमा गाँजासहित सशस्त्र प्रहरीले दुई जनालाई पक्राउ गरेको छ । सुनसरीको धरान उपमहानगरपालिका-१३ शिवधारास्थित कोशी राजमार्गबाट २२७ किलो चार सय ग्राम गाँजासहित उनीहरु समातिएका हुन् ।
सशस्त्र प्रहरी बल, नेपाल सुरक्षा वेश धरानले आज बिहान धनकुटाबाट ईटहरीतर्फ जाँदै गरेको प्रदेश १–०२–००१ ख ९४८९ नम्बरको ट्रक चेकजाँच गरेको थियो । सोही क्रममा आठ पोका गाँजा फेला पारेको सशस्त्रले जनाएको छ ।
सशस्त्रले धनकुटाको छथर जोरपाटी गाउँपालिका-६ बस्ने ३४ वर्षीय ट्रक चालक चन्द्र थापा क्षेत्री र तेह्रथुमको छथर गाउँपालिका- २ का २८ वर्षीय सहचालक चुडामणी कटुवाललाई नियन्त्रणमा लिएको छ ।
उनीहरुको साथबाट ६० हजार नेपाली रुपैयाँ, चार वटा मोबाइल सेट, बाटोको ईजाजत पत्र र सवारी दर्ता प्रमाणपत्र बरामद गरिएको सशस्त्रले जनाएको छ ।
सशस्त्रका अनुसार नियन्त्रणमा लिइएका उनीहरुलाई ट्रक, गाँजा र बरामद सामग्रीसहित आवश्यक कारबाहीका लागि ईलाका प्रहरी कार्यालय, धरान पठाइएको छ ।
टिप्पणीहरू