अनलाईनमा मोबाइल बिक्रिको विज्ञापन राखेर ठगी धन्दा चलाउनेमाथि प्रहरीको कारवाही

अनलाइनमा मोबाइल बिक्रीको नक्कली विज्ञापन राखेर ठगि धन्दा चलाइरहेका एक जना समातिएका छन् । फेसबुक, ह्वाट्सएप, इन्स्टाग्राम, भाइबरजस्ता विभिन्न सामाजिक सञ्जालमा मोबाइल बिक्रीको विज्ञापन राखेर ठगी गरेको अभियोगमा प्रहरीले उनलाई आज पक्राउ गरेको हो । 

पक्राउ पर्नेमा धनुषाको जनकपुर उपमहानगरपालिका वडा नम्बर ४ क्याम्पस चोक घर भई हाल काठमाडौंको डिल्लीबजार बस्दै आएका १९ वर्षीय आदित्य कर्ण रहेको काठमाडौं उपत्यका अपराध अनुसन्धान कार्यालयले जनाएको छ । 

उनले सामाजिक सञ्जालको दुरुपयोग गरेर विभिन्न मोडेलका आईफोन तथा मोबाइल सेटहरुको विज्ञापन गरी ह्वाट्सएप नम्बर र सम्पर्क नम्बर राख्ने गरेका थिए । प्रहरीका अनुसार कर्णले सम्पर्कमा आएका ग्राहकलाई आफ्नो घर पोखरा, चितवनलगायतका स्थान बताएर कुरियरमार्फत मोबाइल डेलिभरी गरिदिने भन्दै पैसा उठाउने गरेका थिए । 

१५ जनाबाट चार लाख ८५ हजार रुपैयाँ लिएका उनले मोबाइल डेलिभरी नगरिदिएपछि पीडितहरुले प्रहरीमा उजुरी दिएका हुन् । आज पक्राउ परेका उनलाई थप अनुसन्धानका लागि जिल्ला प्रहरी परिसर, टेकु पठाइएको छ ।