बिचौलियाद्वारा सर्वसाधारण ठग्ने क्रम जारी, कतारको प्रलोभनमा ६९ लाख झ्वाँम

कतारमा आकर्षक जागिर लगाइदिने नाममा ठग्दै आएका एक जना पक्राउ परेका छन् । आकर्षक तलबको प्रलोभनमा सर्वसाधारणलाई ठग्दै आएका रुद्रबहादुर लिम्बु समातिएका हुन् । 

प्रहरीको काठमाडौँ उपत्यका अपराध अनुसन्धान कार्यालयबाट खटिएको टोलीले धुम्बाराहीबाट उनलाई नियन्त्रणमा लिएको जनाएको छ । 

ताप्लेजुङ घर भई हाल काठमाडौँको थापागाउँ बस्दै आएका ४९ वर्षीय लिम्बूले वैदेशिक रोजगारीमा कतार पठाइदिने र त्यहाँ पुगेपछि पुलिसको जागिर मिलाइदिने भन्दै ठगेका हुन् । कतार जान प्रतिव्यक्ति सात लाख रुपैयाँ लाग्ने र मासिक एक लाखभन्दा बढी तलब हुने प्रलोभनमा पीडितहरुबाट पटक पटक गरी ६९ लाख उठाएपछि उनी सम्पर्कविहीन भएका थिए । 

आफूहरु ठगिएको थाहा पाएपछि उनीहरुले वैदेशिक रोजगार विभाग गुहारेका हुन् । विभागकै अनुरोधमा प्रहरीले खोजतलास अघि बढाउँदा उनी हिजो पक्राउ परेको बताइन्छ । थप अनुसन्धान तथा कारबाहीको निम्ति लिम्बूलाई विभाग पठाइएको छ ।