देउवा परिवारले दिएको दुःख

अहिलेको नक्कली भुटानी शरणार्थी प्रकरणमा चर्चामा आएका, तर ‘कनेक्सन’ प्रमाणित नहुँदा बचेका केही मानिसले फौजी संगठनमा कतिसम्म खेलोमेलो चलाएका रहेछन् भन्ने कुराको चर्चा हल्चोकतिर हुन थालेको छ । 

कपनको जग्गा बेचेर, त्यसबाट आएको पैसा बुझाएपछि एआइजीमा दरबन्दी थप्ने र रातारात बढुवा गर्ने काम भयो, बालुवाटारबाटै । तत्कालीन प्रधानमन्त्री शेरबहादुर देउवाका स्वकीय सचिव भानुले देउवापत्नी आरजु र खाँण पत्नी मञ्जुसँगको मिलेमतोमा यस्ता थुप्रै खेलो चलाए । अहिले नक्कली काण्डमा आर्थिक लेनदेनको प्रमाणित तथ्य अभावका कारण आरजु उम्किँदै आएकी छन् । तर, सशस्त्रका सरुवा र बढुवामा चलाइएको पैसाको खेलोबारे भने हलचोकमा मज्जैसँग कुरा हुने गरेको छ ।

बढुवा गरिएका वंशी दाहाललाई जिम्मेवारी दिइयो, सीमा सुरक्षा हेर्ने विभागको । जतिबेला बारा, पर्सा र नवलपरासीबाट अनियमितताको आरोपमा त्यहाँका गणपति (एसपी) हरू तानिँदै थिए, वंशीचाहिँ ‘उत्कृष्ट काम गरेको’ भनी पुरस्कार थापिरहेका थिए । जबकि, उनको कमाण्डभित्र रहेका तेजेन्द्र पोखरेल पर्साबाट, राजेन्द्र थापा बाराबाट र रूपकुमार क्षेत्री पश्चिम नवलपरासीबाट करोडौं राजस्व छलीमा व्यापारीलाई सहयोग गरेको आरोपसहित रातारात तानिएका थिए । तर, त्यो कारवाही पनि देखावटीमात्रै भयो । 

रौतहटका एसपी ध्रुव कार्कीलाई उत्कृष्ट गणपति भनेर पुरस्कृत गर्ने तयारी थियो । कुरा लाउनमा माहिर ललितपुरका गणपति विकास घिमिरेलाई इन्टेलिजेन्स ब्यूरोको दोस्रो हाकिम बनाइयो । त्यस्तै अत्याचार भयो, दार्चुलाको राशनकाण्डमा मुछिएका एसपी त्रिभुवन बिष्टको हकमा । उनी दार्चुलास्थित ४४ नम्बर गणका गणपति हुँदा धेरै कर्मचारीलाई एकैचोटि बिदा छाडी राशन घोटाला भएको थियो । थापाको छानवीन टोलीले उनलाई दोषी ठहर गर्‍यो, तर कारवाहीको भागिदारचाहिँ वरिष्ठ हवल्दार नरेशसिंह साहु भए र जेल गए । त्रिभुवनलाई केही दिन हेडक्वार्टरमा राखी पछि बालुवाटारकै दबाबमा कैलालीस्थित शिक्षालय प्रमुख बनाएर पठाइयो । त्यसअघि भानु र आरजुले उनलाई दार्चुलामै राख्ने प्रयास गरेका थिए । 

त्यस्तै व्यक्ति हेरेर दरबन्दी खडा गरिँदा थुप्रै अफिसर मारमा परे । भेटी बुझाउने अधिकृतलाई पोस्नका लागि लेखा समूह खडा गरियो । सशस्त्रको सिसं ३ मा भर्ना भएका इन्स्पेक्टरहरू अहिलेसम्म डिएसपी नै छन्, तर एकजनालाई एसएसपी बनाइयो । सिसं १ का सबै डिआइजी भए । तर, सिसं ३ का इन्स्पेक्टरहरू १८–१९ वर्षदेखि डिएसपीमै थन्किँदा होम ज्ञवाली एक्लै एसएसपी बनाइए । त्यही बेला एकाउण्टेण्टका लागि विभिन्न बाहिनीमा डिएसपी दरबन्दी सिर्जना गरेर गणेश मल्लहरूलाई फुलि थपियो । भानुका बहिनी ज्वाइँ दीपेन्द्र कुँवर इन्स्पेक्टरबाट डिएसपी हुँदा ७० नम्बरमा, डिएसपीबाट एसपी बनाउँदा ११, त्यसबाट एसएसपी बनाउँदा १ नम्बरमा ल्याउने काम भयो । त्यसका लागि चार वर्षमा मात्रै बढुवा हुने व्यवस्था नै परिवर्तन गरेर तीन वर्षे बनाइयो । त्यो नहुँदासम्म आइजी राजु अर्याललाई टोपी फुकालेर हिँड्नुपर्ने बाध्यता थियो । 

(जनआस्था साप्ताहिकबाट साभार)