भारतबाट ल्याइएका अवैध जिप र सामान सशस्त्रको कब्जामा

सशस्त्र प्रहरी बल नेपालले भन्सार महशुल नतिरी नेपाल भित्र्याइएको भारतीय नम्बर प्लेटको स्करपिओ जिप नियन्त्रणमा लिएको छ । सशस्त्रले बाराको सिम्रौनगढ नगरपालिका १, वीरेन्द्र चोकबाट उक्त सवारी साधनलाई नियन्त्रणमा लिएको बताएको छ ।

बैरियाबाट सिम्रौनगढतर्फ जाँदै गरेको एचआर २६ बीबी ००४० नम्बरको सेतो रंगको भारतीय गाडीलाई प्रस्तावित सीमा सुरक्षा गुल्म पिपरपातीले नियन्त्रणमा लिएको हो । उक्त जिपलाई आवश्यक कारबाहीको निम्ति भन्सार कार्यालयमा बुझाइएको छ ।

त्यसैगरी रौतहटको गौर नगरपालिका २, स्थित भन्सार इलाकाबाट एक लाख १९ हजार ७ सय ८० रुपैयाँ बराबरको किराना सामान तथा लत्ताकपडा पनि सशस्त्र प्रहरीले बरामद गरेको छ । भारतबाट अवैध रुपमा ल्याइएको उक्त सामान प्रस्तावित सीमा सुरक्षा गुल्म गौरले बरामद गरेको हो ।

सशस्त्रको नम्बर ३४ गण, कैलालीले धनगढी उपमहानगरपालिका ३, चटकपुर इलाकाबाट पनि नेपाल ल्याउँदै गरेको एक लाख छ हजार चार सय ५० रुपैयाँ बराबरको लत्ताकपडा बरामद गरेको छ । बरामद सामान स्थानीय भन्सार कार्यालयमा बुझाइएको सशस्त्रले जानकारी दिएको छ ।