दोब्बर उमेरकी प्रेमिका मारेर भागेका प्रेमी गिरफ्तार

दोब्बर उमेरकी महिला तथा प्रेमिकाको हत्या गरेको अभियोगमा २२ वर्षीय प्रेमी ओमलाल मण्डल समातिएका छन् ।

बाराको कलैया उपमहानगरपालिका–१८ घर भई जनकपुरधाममा घर बनाउने मिस्त्रीको काम गर्ने मण्डललाई कर्तव्य ज्यान कसूरमा पक्राउ गरिएको जिल्ला प्रहरी कार्यालय धनुषाले जनाएको छ । 

मिथिलाबिहारी नगरपालिका तारापट्टीकी करिब ४५ वर्षीया उषा दासका श्रीमानको मृत्युपश्चात युवक र उनी प्रेम सम्बन्धमा रहे पनि विवाहको विषयमा कुरा नमिलेपछि घटना भएको बताइन्छ । प्रहरीका अनुसार गत बिहीबार राति ११ बजे विवाको विषयमा दुबैजनाबीच विवाद हुँदा ओमलालले एक थप्पड हानेको र थप्पड हान्नसाथ भाग्न खोजेकी महिलालाई उनले घाँटी थिचेर मारेको प्रहरी अनुसन्धानबाट खुलेको छ । 

आइतबार साँझ करिब ५ बजेको समयमा मिथिलाबिहारी–८ तारापट्टीस्थित पोखरीको छेउमा गाडिएको अवस्थामा शव फेला परेको थियो । स्थानीयले देखेपछि प्रहरीलाई खबर गरेका थिए । 

हत्यापश्चात युवकले पोखरीको छेउमा खाल्डो खनेर शव गाडेको स्वीकारेका छन् । महिलाको कपडासमेत खोली सोही पोखरीको अर्को छेउमा गाडेर महिलाले प्रयोग गरेको मोबाइल पोखरीमै फालेर उनी फरार भएका थिए ।