झूठा ठहरिए सरकारी वकिलहरु जेल जान तयार

सरकारी वकिलले नक्कली शरणार्थी प्रकरण गलत हिसाबले अदालतसम्म ल्याएको ठहरिएमा जेल जानुपरे पनि आफूहरु तयार रहेको बताएका छन् । 

नक्कली शरणार्थी प्रकरणमा सरकारी वकिलका तर्फबाट जवाफी बहसका क्रममा काठमाडौं  जिल्ला सरकारी वकिल कार्यालयका सहन्यायाधिवक्ता लक्ष्मण घिमिरेले यस्तो बताएका हुन् । 

काठमाडौँ जिल्ला अदालतका न्यायाधीश प्रेम प्रसाद न्यौपानेको इजलासमा शुक्रवार १८ जना आरोपित  प्रतिवादीको तर्फबाट कानुन व्यवसायीहरुले  बहस सकेसँगै अहिले  सरकारी वकिलहरु जबाफी बहसमा उत्रिएका छन् ।  
बहसका क्रममा सरकारी वकिल लक्ष्मण घिमिरेले अहिले मुद्दामात्र चलाएर प्रमाण नपुग्दा डामेर छोडेजस्तो हुने हुँदा प्रमाण पुगेकालाई मात्र ल्याइएको र अर्को मुद्दामा गजेन्द्र बुढाथोकीलाई समेत प्रतिवादी बनाइने बताएका छन् । 

उनले पक्राउ परेकाहरूलाई थुनामै राखेर पुर्पक्ष गरिनुपर्ने जिकिर गरेका छन् । 

सहन्यायाधिवक्ता घिमिरेले  इजलाशसमक्ष भने-गलत अभियोग लगाएको नभई संविधानअनुसार नै प्रतिवादीहरुलाई मुद्दा चलाइएको हो । यो प्रकरणलाई गलत हिसाबले अदालतसम्म ल्याएको ठहरिए जेल जानुपरे हामी तयार छौं श्रीमान । 

उनले यो प्रकरणमा मुद्धा चलाउनेहरु नै जेल जानुपर्ने हो भने प्रतिवादीहरु निस्किने अवस्था छ त श्रीमान भन्दै इजलाशसमक्ष प्रश्न समेत राखे ।  

प्रतिवादीका तर्फबाट जिल्ला सरकारी वकिलको कार्यालय काठमाडौँका प्रमुख अच्युतमणि न्यौपानेसहितका अरु दुई जना सरकारी वकिलहरुले  जवाफी बहस गर्ने कार्यतालिका छ । 

न्यायाधीश न्यौपानेले हिजो  इजलास उठ्ने बेला २ बजेसम्म सरकारी वकिलको जवाफी बहस सुन्ने र त्यसपछि आदेश दिने बताएका थिए । 

नक्क्ली भुटानी शरणार्थी प्रकरणमा पक्राउ परेकाहरुलाई पुर्पक्षका लागि थुनामा पठाउने कि तारेखमा छाड्ने निर्णय  सम्भवत आजै काठमाडौं  जिल्ला अदालतले सुनाउनेछ ।