सट्टेबाजीमा संलग्न राजकुमार समातिए

ब्रिटिङ एप्लिकेशन वानएक्स बीईटीमार्फत सर्वसाधारणलाई सट्टेबाजीमा उत्प्रेरित गराएको आरोपमा एक जना पक्राउ परेका छन् । 

काभ्रेपलाञ्चोकको तेमाल घर भई हाल काठमाडौंको बूढानीलकण्ठ बस्दै आएका २२ वर्षीय राजकुमार थापा भन्ने राजकुमार तामाङ प्रहरी नियन्त्रणमा पुगेका हुन् । 

उनले आफ्नो युट्युबमार्फत् वानएक्स बीईटीको प्रचारप्रसारमा सहयोग पुग्ने गरी प्रोमो कोडसमेत दिएर विज्ञापन गरेको पाइएको छ । यसबाट सर्वसाधारणलाई सट्टेबाजीमा उत्प्रेरित गरेको प्रहरीको आरोप छ । 

काठमाडौं उपत्यका अपराध अनुसन्धान कार्यालयबाट खटिएको टोलीले उनलाई कपनबाट नियन्त्रणमा लिएको हो । थप अनुसन्धानको निम्ति प्रहरी परिसर काठमाडौं पठाइएको छ ।