रंगेहात पक्राउ परेका प्रमुख प्रशासकीय अधिकृतविरुद्ध मुद्दा दायर

रुपन्देहीको शुद्धोधन गाउँपालिकाका प्रमुख प्रशासकीय अधिकृत अनन्तपाणी मरासिनीसहित तीन जना ५० हजार रुपैयाँ घुससहित पक्राउ परेका छन् । 

अख्तियार दुरुपयोग अनुसन्धान आयोगको टोलीले मरासिनीसहित वडा नम्बर ७ का वडाध्यक्ष भीमबहादुर यादव र विचौलिया विनोद भरलाई घुस रकमसहित पक्राउ गरेको जानकारी दिइएको छ ।

नदीजन्य पदार्थको बिक्री आदेशको म्याद थप गरिदिने उद्देश्यले सेवाग्राहीसँग घुस लिएलगत्तै आयोगको बुटवल कार्यालयबाट खटिएको टोलीले उनीहरुलाई नियन्त्रणमा लिएको हो ।

केहि दिन अघि घुस बुझेको समेत पुष्टि हुन आएकाले उनीहरुविरुद्ध भ्रष्टाचार निवारण ऐन, २०५९ को दफा ३ को उपदफा (१) बमोजिम आज विशेष अदालत काठमाडौंमा भ्रष्टाचार मुद्दा दायर गरिएको अख्तियारले जनाएको छ ।