सट्टाबाजीमा दम्पतीको संलग्नता

अनलाइनमार्फत् सट्टाबाजी खेल्ने खेलाउने आरोपमा चार जना पक्राउ परेका छन् । काठमाडौं उपत्यका अपराध अनुसन्धान कार्यालयबाट खटिएको प्रहरी टोलीले उनीहरुलाई नियन्त्रणमा लिएको हो । 

पक्राउ परेकामा काठमाडौंको कलंकी बस्दै आएका २४ वर्षीय राजा चौधरी, २५ वर्षीय विवेक चौधरी र ठमेलका २५ वर्षीय रितेन्द्र प्रधानसँगै उनकी श्रीमती २४ वर्षीया आशा गुरुङ हुन् ।

कार्यालयका प्रवक्ता एवम् सूचना अधिकारी रविन्द्र रेग्मीका अनुसार उनीहरुले अनलाइन ग्याम्लिङ प्ल्याटफर्मको प्रयोग गरी अनलाइनमार्फत रकमको बाजी राख्न लगाई सट्टाबाजी गराई खेल खेलाउने गरेको पाइएको छ । 

साथै, विभिन्न विदेशी नाम गरेका व्यक्तिले च्याटमार्फत उनीहरुको अनलाइनमा रकम डिपोजिट गरिदिने र दैनिक आठ घण्टाको दरले चलाई आर्थिक लाभ लिने गरेको कुराकानी समेत फेला परेको उनले बताएका छन् । 

प्रवक्ता रेग्मीले उनीहरुलाई थप अनुसन्धान एवम् कारबाहीका निम्ति जिल्ला प्रहरी परिसर टेकू पठाइएको पनि जानकारी दिएका छन् ।