महिलाको सामूहिक बलात्कारपछि ज्यान लिएका फरार हत्यारा १२ वर्षमा फेला

ज्यान मार्ने मुद्दामा फरार प्रतिवादी सूर्य थोकर भन्ने सूर्यबहादुर थोकर पक्राउ परेका छन् । मकवानपुरको हेटौंडा उपमहानगरपालिकाका ३३ वर्षीय उनलाई प्रहरीले नियन्त्रणमा लिएको छ । 

थोकर समेतका प्रतिवादीहरुले २०६८ असोज २६ गते राति पीडित महिलाकै घरमा पुगेर पालैपालो बलात्कार गरेपछि धारिलो हतियारले घाँटी रेटी हत्या गरेका थिए । 

जिल्ला अदालत मकवानपुरको २०७८ वैशाख ५ गतेको फैसलाले उनीसहितका प्रतिवादीलाई ज्यान मारेको मुद्दामा दोषी ठहर गर्दै ज्यान मारेकोतर्फ २० वर्ष, ज्यान मार्ने षड्यन्त्र गर्नेतर्फ १२ वर्ष, जबरजस्ती करणी गरेकोमा ७ वर्ष र सामूहिक रुपमा जबरजस्ती करणीतर्फ ५ वर्ष गरी कुल ४४ वर्ष कैद सजाय सुनाएको थियो । 

तर, अदालतको फैसला अगावै फरार उनलाई केन्द्रीय अनुसन्धान ब्यूरो महाराजगञ्जबाट खटिएको प्रहरी टोलीले उदयपुरको त्रियुगा नगरपालिका १२ गाईघाटबाट नियन्त्रणमा लिएको जनाएको छ । 

उनलाई फैसला कार्यान्वयनका निम्ति जिल्ला अदालत मकवानपुरमा पेश गरी अदालतको आदेशबमोजिम कैद भुक्तान का लागि कारागार पठाइएको छ ।