टेकूका ल्याब टेक्नोलोजिस्टविरुद्ध भ्रष्टाचार मुद्दा दायर

अख्तियार दुरुपयोग अनुसन्धान आयोगले टेकूस्थित राष्ट्रिय जनस्वास्थ्य प्रयोगशालामा कार्यरत ‘मेडिकल ल्याब टेक्नोलोजिस्ट’ लेखनाथ भट्टराई विरुद्ध भ्रष्टाचारको मुद्दा दायर गरेको छ ।

घुस लिएको अभियोग लागेका उनलाई विशेष अदालतमा मुद्दा दायर गरिएको बताइएको छ । भट्टराईले प्रयोगशालामा दर्ता प्रक्रिया अगाडि बढाउन सहजीकरण गरिदिने नाममा सेवाग्राहीसँग ५० हजार घूस लिएको बताइन्छ । 

उनलाई घूस लिँदै गरेको अवस्थामा आयोगको टोलीले पक्राउ गरेको थियो । आरोपी भट्टराईलाई बिगोबमोजिम कारबाहीको माग गर्दै मुद्दा दायर गरिएको छ । आयोगले सप्तरीको अग्निसाइर कृष्णासवरन गाउँपालिका–५ का वडाध्यक्ष सबदुल मियाँविरुद्ध पनि विशेष अदालतमा मुद्दा दायर गरेको छ ।

उनले भवन निर्माण सम्पन्नको सिफारिसको नाममा सेवाग्राहीसँग ५० हजार घूस लिएका थिए । उनीविरुद्ध पनि बिगोबमोजिमको कारबाहीको माग गरिएको छ ।