नाबालिगलाई प्रबेश दिने नाइट क्लवका अर्का सञ्चालक पनि समातिए

काठमाडौं ठमेलमा रहेको चर्चित नाइट क्लब एलओडीका सञ्चालक रुदिल बल्लव श्रेष्ठ समातिएका छन् । नाबालिगलाई क्लबभित्र प्रवेश गराएको आरोपमा प्रहरीले उनलाई आज पक्राउ गरेको हो ।  

 यसअघि सोही क्लबका अर्का सञ्चालक राजुसिंह सुवाल हिजो पक्राउ परेका थिए । जिल्ला अदालतबाट पक्राउ पुर्जी लिएर ललितपुर प्रहरी परिसरले उनीहरुलाई अनुसन्धानका लागि नियन्त्रणमा लिएको हो । 

गत ३१ जेठमा एलओडीमा छिरेकी १६ वर्षीया बालिका सानेपामा बलात्कृत भएकी थिइन् । सोही घटनाले एलओडीका सञ्चालकद्वय श्रेष्ठ र सुवाललाई अनुसन्धान र कारबाहीको दायरामा समातेको प्रहरीले जनाएको छ । 

उनीहरुविरुद्ध बालबालिका सम्बन्धी ऐन २०७५ उल्लंघन गरेको आरोपमा मुद्दा चलाइने पनि प्रहरीको भनाई छ ।