जहाज चढ्नै लाग्दा समातिएका थिए सञ्चार मन्त्रालयका सचिव

बालुवाटारस्थित ललिता निवासको सरकारी जग्गा हिनामिना गरेको आरोप लागेका सञ्चार मन्त्रालयका सचिव कृष्ण बहादुर राउत पक्राउ परेका छन् । 

प्रहरीको केन्द्रीय अनुसन्धान ब्युरो (सिआइबी)ले राउतलाई त्रिभुवन अन्तराष्ट्रिय विमानस्थलबाट आज साँझ नियन्त्रणमा लिएको हो । यति एयरको एनवाईटि-७९३ नम्बरको उडानबाट विराटनगर जाने क्रममा साँझ सवा पाँच बजे ब्युरोको टोलीले जहाजको ढोकाबाट उनलाई समातेको बताइएको छ । 

राउतमाथि भौतिक मन्त्रालयमा शाखा अधिकृत हुँदा ललिता निवासको सरकारी जग्गा व्यक्तिको नाममा दर्ता गराउन भूमिका खेलेको आरोप लागेको छ । उनीविरुद्ध यसअघि नै पक्राउ पूर्जी जारी भएको थियो । 

यो प्रकरणमा ५ पूर्वसचिवसहित ४ सयभन्दा बढी विरुद्ध पक्राउ पुर्जी जारी भइसकेको छ । भाटभटेनी सुपर मार्केटका मालिक मीनबहादुर गुरुङसहित ९ जनालाई सिआइबीले नियन्त्रणमा लिएको छ ।