झोलाभरी पैसा हालेर भारत उड्न ठिक्क परेका अमेरिकी नागरिक एयरपोर्टबाट पक्राउ

भारत जान लागेका एकजना यात्रु अवैध मुद्रासहित त्रिभुवन अन्तर्राष्ट्रिय विमानस्थलबाट पक्राउ परेका छन् । 

भिस्तारा एयरलाइन्सको उडानमा काठमाडौंबाट भारतको दिल्ली प्रस्थान गर्न लागेका अमेरिकी नागरिक ४९ वर्षीय केभिन वेस्ले फिलिप्सको साथमा विभिन्न देशका मुद्रा भेटिएपछि विमानस्थल प्रहरीले उनलाई समातेको हो । 

प्रहरीका अनुसार विमानस्थलको अन्तर्राष्ट्रिय उडानतर्फको प्रस्थान ह्याण्ड ब्यागेज चेकिङ एरियाको ऐक्सरे मसिनमा स्क्रिनिङ गर्ने क्रममा उनको ब्यागबाट अमेरिकी डलर १ सय दरको ३ सय ८० थान र श्रीलकन रुपैयाँ ५ हजार दरको ५३ थान, १ हजार दरको ४ थान, ५० दरको ५ थान र २० दरको ५ थान बरामद गरिएको छ ।
 
पक्राउ परेका केभिनलाई आवश्यक अनुसन्धानको निम्ति प्रहरी वृत्त गौशाला पठाइएको छ ।