तालिम चलाउने नाममा सरकारी रकम हिनामिना गर्नेहरु अख्तियारको फन्दामा

सहकारीसम्बन्धी तालिम सञ्चालन गर्दा रकम हिनामिना गरेको आरोप लागेका एक दर्जनविरुद्ध अख्तियार दुरुपयोग अनुसन्धान आयोगले भ्रष्टाचार मुद्दा दायर गरेको छ । 

सरकारी रकम दुरुपयोग गरेको बात लागेका भूमि व्यवस्था तथा सहकारी मन्त्रालयअन्तर्गत सहकारी तथा गरिबी निवारण शाखा मधेश प्रदेशका वरिष्ठ शाखा अधिकृत ओमनारायण झा, नैँशी जेनरल अर्डर सप्लायर्सका प्रोप्राइटर अरहुला कुमारी र अरु ११ जनाविरुद्ध आज विशेष अदालतमा मुद्दा दायर भएको हो ।  

प्रदेशका आठवटै जिल्लामा सहकारीसम्बन्धी आयमूलक तालिम सञ्चालन गर्दा भ्रष्टाचार गरेको आरोपमा आयोगले झाविरुद्ध सात लाख एक हजार तीन सय ८० जरिवाना र बिगोसमेत असुल उपरको माग गरेको छ ।

त्यस्तै, सरकारलाई हानी पुर्याउनेगरी झूठा बिल भरपाई तयार गरेको आरोपमा कुमारीविरुद्ध तीन लाख ६७ हजार आठ सय ८० बिगो माग दाबी गरिएको छ । 

यी दुईसहित १३ जनाविरुद्ध विशेष अदालतमा भ्रष्टाचारको मुद्दा दायर गरेको आयोगका सहायक प्रवक्ता देवीप्रसाद थपलियाले जानकारी दिए ।