प्रधानमन्त्रीको बन्यो अमेरिकी उडान तालिका,चीनबाट फर्कंदा पनि काठमाडौंका आकाश ठप्प

प्रधानमन्त्री पुष्पकमल दाहाल प्रचण्ड भोलि साँझ अमेरिका प्रस्थान गर्ने अन्तिम तयारी छ । आज बिहान त्रिभुवन अन्तर्राष्ट्रिय विमानस्थल नागरिक उड्डयन प्राधिकरण कार्यालय गौचरको मिटिङ हलमा बसेको बैठकले सम्पूर्ण सुरक्षाको समीक्षा गरेको छ । 

त्यसका लागि भोलि बेलुकी ५:४० देखि सवा ६ बजेसम्म काठमाडौं विमानस्थलबाट हुने सम्पूर्ण उडान र अवतरण रोकिने छ । त्यस्तै उहाँ चीनको औपचारिक भ्रमणपछि फर्कने असोज १३ गते बिहान १०ः५५ देखि साढे ११ बजेसम्म पनि काठमाडौंको आकाशमा उडान निषेधित गर्ने निर्णय भएको छ । विमानस्थलमा रहेका सुरक्षा निकायहरुदेखि विभिन्न एक दर्जन कार्यालय तथा संस्थाका प्रतिनिधिको उपस्थितिमा उक्त निर्णय भएको हो । 

प्रधानमन्त्री अमेरिकाको न्युयोर्कमा हुन लागेको संयुक्त राष्ट्र संघको ७८ औं महासभामा भाग लिन नेपाली प्रतिनिधिमण्डलको नेतृत्व गर्दै भोलि बेलुकी कतार एअरवेजको उडान नम्बर क्युआर ६४७ मा साँझ ६ बजे दोहा प्रस्थान गर्ने कार्यक्रम छ । उहाँ साँझ ५ बजेर ५० मीनेटमा कतार एअरवेजको विमानभित्र प्रवेश गरिसक्नु हुनेछ । 

दोहामा केही बेरको ट्रान्जिटपछि प्रधानमन्त्री र उहाँको टोली अमेरिकन एअरलाइन्सको उडानमा  न्युयोर्क जाने कार्यक्रम रहेको बैठकमा जानकारी गराइएको छ ।न्युयोर्कबाट उहाँ असोज पहिलो साता चीनको औपचारिक भ्रमणका लागि हाङ्चौ शहर पुग्नुहुनेछ । हाङचौमा हुन लागेको एसियाली खेलकुदको उद्घाटन समारोहमा भाग लिएपछि उहाँ राजधानी बेइजिङ जाने कार्यक्रम छ ।

चीन भ्रमणपछि उहाँ असोज १३ गते शनिबारका दिन बिहान सिचुआन प्रान्तको राजधानी छन्तुबाट एअर चाइनाको उडानमा स्वदेश फर्कनुहुनेछ । उडान नम्बर सिए ४३७ बाट प्रधानमन्त्री बिहान ११ बजेर ५ मीनेटमा काठमाडौं ओर्लने निर्णयमा उल्लेख छ । उक्त विमान विमानस्थलको बे नम्बर १ मा रोकिने र आवश्यकतानुसार बे नम्बर २ पनि खाली गराइने सुरक्षा निकायको भनाई छ ।

काठमाडौंबाट दोहा जाँदा भोलि बेलुकी कतार एअरवेजको विमान बे  नम्बर ४ मा राख्ने निर्णय भएको छ । सुरक्षा निकायहरु,विमानस्थल कार्यालय,भन्सार कार्यालय, सम्बन्धित विमान कम्पनी, नेपाल वायुसेवा निगमलाई आफ्नो क्षेत्रको कार्यको जिम्मा दिइएको छ । प्रधानमन्त्रीले गर्ने पत्रकार सम्मेलनमा बत्तिको बल्ब जाँच्ने, साउण्ड सिस्टम परीक्षण गर्ने जिम्मा विमानस्थलको टेक्निकल डिपार्टमेन्टलाई दिइएको छ । सिभिल इञ्जिनियरिङ विभागलाई भीभीआईपी कक्ष सरसफाईको जिम्मेवारी दिइएको छ ।