पल शाहको सुनको ब्रासलेट फ्यानहरुले गायब बनाएको आरोप

-टेकसिंह धामी

धनगढीमा जारी सुदूरपश्चिम महोत्सवमा नायक पल शाह भनेर चिनिने पूर्णविक्रम शाहको ब्रासलेट हराएको छ । स्रोतका अनुसार शाहको करिब ३ तोला (दाबी गरिएको) सुनको ब्रासलेट हराएको बताइएको छ ।

स्टेज प्रस्तुतिका क्रममा उनका फ्यानहरुले हात तानेर ब्रासलेट खोसेको बताइएको छ । तर, कसले खोस्यो ? भन्ने विषयमा कुनै पत्तो लाग्न नसकेको बुझिएको छ ।

ब्रासलेट खोज्न सिसिटिभी हेरिएपनि अहिलेसम्म फेला नपरेको महोत्सवका सांस्कृतिक संयोजक मिलन कुँवरले बताए । उनका अनुसार हराएको ब्रासलेट फेला परेको छैन । तर शाहले ब्रासलेट हराएकोमा कुनै दुःख व्यक्त नगरेको र त्यसलाई धनगढीको मायाका रुपमा लिएको कुँवरले दाबी गरे ।

महोत्सव कार्यक्रममा उद्घोषकले पनि नायक शाहको ब्रासलेट हराएको जानकारी गराएका थिए । प्रहरीले भने ब्रासलेट हराएको विषयमा जानकारी नै नआएको जनाएको छ । यसबारे बुझ्न नायक शाहलाई सम्पर्क गर्न खोज्दा उनको फोन उठेन । शाह उनै नायक हुन्, जोविरुद्ध अदालतमा उमेर नपुगेकी किशोरीमाथि बलात्कारको मुद्दासमेत चलिरहेको छ ।

उद्योग वाणिज्य महासंघ कैलालीले आयोजना गरेको महोत्सवमा शनिबारमात्रै एक लाख बढी दर्शक उपस्थित भएको आयोजकको दाबी छ ।