एनआइसी एशिया बैंक नक्कली बील बनाउँदै, राष्ट्र बैंक छानबिनको सुर कस्दै

एनआइसी एशिया बैंकमाथि विभिन्न शीर्षकको खर्चमा नक्कली बील प्रयोग गरेको आरोप लागेको छ । बैंकले गरेको स्वागत तथा आतिथ्य खर्चको बील अस्वाभाविक भएको जनाउँदै त्यहीँका कर्मचारीले छानबिनका लागि केन्द्रीय बैंक गुहारेका छन् ।

विशेषगरी काठमाडौं, बुटवल,चितवन, नेपालगञ्ज र विराटनगरमा अतिथिहरुको स्वागतका निम्ति भएको होटल तथा रेष्टुरेन्ट खर्चको बील अस्वाभाविक भएको आरोप छ । कर्मचारीहरुले राष्ट्र बैंकको बालुवाटारस्थित गभर्नर कार्यालयमा दर्ता गराएको उक्त उजुरीमाथि कारबाही प्रक्रिया अघि बढेको बुझिएको छ ।

‘पत्र प्राप्त भएको छ । अवस्था कस्तो रहेछ पत्ता लगाएर रिपोर्ट माथि पेश गर्नेछौं ।’

गभर्नर महाप्रसाद अधिकारीको तोक आदेशपछि उक्त उजुरीबारे आवश्यक छानबिन गर्न सचिवालयले दरबारमार्गस्थित बैंक सुपरीवेक्षण विभागलाई लिखित आदेश दिएको छ । गभर्नर कार्यालयबाट अस्तिको मितिमा पत्र प्राप्त भएको विभागीय स्रोतले पुष्टि गरेको छ ।

एनआइसी एशियाले लाखौंको बील फर्जी बनाएको उजुरीमा उल्लेख छ । यसअघि बैंकले केन्द्रीय बैंकका अधिकृतहरुलाई हेलिकोप्टर चढाएको उजुरी पनि बालुवाटार पुगेको छ ।

शुक्रबार गभर्नरको कार्यालयले लेखेको पत्रबारे सुपरीवेक्षण विभागले यो साताभित्रै यथार्थ पत्ता लगाइने जनायो । स्रोत भन्छ, ‘पत्र प्राप्त भएको छ । अवस्था कस्तो रहेछ पत्ता लगाएर रिपोर्ट माथि पेश गर्नेछौं ।’