सरकारी प्रतिनिधि तारे होटलका कार्यक्रममा गएको, एकेडेमी नछिरेको सहकारी पीडितहरुको आरोप

सहकारी पीडितहरुले पुनः आन्दोलन थाल्ने तयारी गरेका छन् । सरकारले सहकारी संस्थाहरुको समस्या समाधानमा चासो नदेखाएपछि पीडितहरुले पुनः आन्दोलन घोषणा गरेका हुन् । सहकारी बचतकर्ता संरक्षण राष्ट्रिय अभियानले आज आन्दोलनको कार्यक्रम सार्वजनिक गरेको छ । 

आगामी आइतबार बिहान १० बजेदेखि बेलुकी ५ बजेसम्म सहकारी विभागमा धर्ना दिइने अभियानका अध्यक्ष कुशलव केसीले बताए । मंगलबार काठमाडौं, भक्तपुर र ललितपुरको प्रत्येक गल्लीमा कोणसभा, घरदैलो कार्यक्रम र चैत १ गतेदेखि काठमाडौं केन्द्रित बृहत आन्दोलन गर्ने जानकारी दिए । 

उनका अनुसार आन्दोलनमा मुलुकभरका सहकारी पीडित सहभागी हुनेछन् । सरकारले सहकारी पीडितको समस्यालाई बेवास्ता गरेकाले बाध्य भएर आन्दोलन घोषणा गर्नुपरेको उनी बताउँछन् । गत साउन १८ गते सिंहदरबारमा सरकारका प्रतिनिधि र पीडितसँग भएको सात बुँदे सम्झौता पनि कार्यान्वयन नगरिएको केसीको भनाई छ । 

‘सरकारले हामी सहकारी पीडितलाई थप पीडित बनाउने काम गरेको छ । सहकारी पीडितको समस्या समाधान गर्नुको साटो सरकारका प्रतिनिधिले सहकारी सञ्चालकसँग पाँच तारे होटलमा विभिन्न सम्झौता गरेका छन् । हामीले माघ २५ गते राष्ट्रिय प्रज्ञा प्रतिष्ठानमा कार्यक्रम राखेका थियौं । सरकारका प्रतिनिधिहरुलाई पनि बोलाएका थियौं तर कोही उपस्थित हुनुभएन । माघ २७ गते सहकारी सञ्चालकहरुको कार्यक्रममा मन्त्रीदेखि सबै पुग्नुभएको थियो । सरकारले नै सहकारीका सञ्चालकहरुलाई जोगाइरहेको छ’, उनले भने । 

पछिल्लो समय एकपछि अर्को सहकारीमा समस्या देखिरहेको छ । सहकारी पीडितहरुले लामो समयदेखि आफ्नो बचत फिर्ता पाएका छैनन् । आफ्नो बचत फिर्ता माग गर्दै पीडितहरुले गत जेठ २० गतेदेखि राजधानीको माइतीघर मण्डलामा दुई महिना लामो आन्दोलन गरेका थिए ।