थाल चम्चा बजाउँदै राष्ट्र बैंक घेर्न निस्किए लघुवित्त पीडित

देशका विभिन्न स्थानबाट पैदलयात्रा गरी काठमाडौं आइपुगेका मीटरब्याज पीडितहरुले आज पनि विरोध प्रदर्शन जारी राखेका छन् । 

लघुवित्त तथा वित्तीय शोषणविरुद्दको संघर्ष समिति'को अगुवाइमा पिडितहरुले आज विरोध र्यालीसहित राष्ट्र बैंक घेराऊ गर्न लागेका हुन् । मध्याह्न सिफल चौरबाट थाल, चम्चासहित निस्किएको र्यालीका सहभागीहरुले बालुवाटारस्थित राष्ट्र बैंकको केन्द्रीय कार्यालय पुगेर धर्ना दिने कार्यक्रम रहेको जनाइएको छ । 

सिफल चौरबाट निस्किएको र्याली जय बागेश्वरी, चावहिल, गणेश मन्दिर, पहेँलो पुल, हाँडीगाउँ, भाटभटेनी पिपल बोट हुँदै बालुवाटार पुग्नेछ । र्यालीका क्रममा पीडितहरुले 'बाँचौ, बचाउँ र अघि बढौँ', 'आमगरिब किसानलाई नि:शुल्क ऋण प्रदान गर', 'कालोसूची तथा धितो लिलाम फुकुवा गर', 'समाजवादी अर्थतन्त्रको विकास गर', 'जनपक्षीय मौद्रिक नीति कायम गर' जस्ता नाराबाजी गरेका छन् ।

मुग्लिनदेखि पैदल हिँडेर फागुन ६ गते काठमाडौँ आइपुगेका पीडितहरु केही दिनदेखि सिफल चौरमा बसिरहेका छन् ।