रवि लामिछानेको कार्यालय अगाडि पीडितहरुको धर्ना, प्रत्यक्ष निर्वाचित राष्ट्रपतिको माग

लघुवित्त पीडितहरुले राष्ट्रिय स्वतन्त्र पार्टी (रास्वपा) को पार्टी कार्यालय अगाडि धर्ना दिएका छन् । काठमाडौंको बनस्थलीस्थित रास्वपाको केन्द्रीय पार्टी कार्यालयमा आज उनीहरुले धर्ना दिएका हुन् । 

लघुवित्त तथा वित्तिय शोषणविरुद्धको संघर्ष समितिको अगुवाईमा झण्डै ८० जनाले त्यहाँ पुगेर पार्टी नेतृत्वलाई ज्ञापनपत्र समेत बुझाइएको छ । सहकारी, बैंक, लघुवित्त तथा वित्तिय संस्थाहरुको कालोसूची र धितो लिलामको प्रक्रियाले लाखौं सर्वसाधारण सुकुम्बासी भएको जनाउँदै उनीहरुले यस्ता गतिविधि रोक्न सहजीकरणका लागि आग्रह समेत गरेका छन् । 

लघुवित्तिय संस्थाहरु खारेज गर्नुपर्ने, सामूहिक ऋण मिनाहा गर्नुपर्ने, आम गरिब किसानलाई निःशुल्क ऋण प्रदान गर्नुपर्ने, आवश्यकता र क्षमतामा आधारित काम र दामको व्यवस्था गर्नुपर्ने, समाजवादी अर्थतन्त्रको विकास गर्नुपर्ने, जनपक्षीय मौद्रिक नीति कायम गर्नुपर्ने, कालोसूची तथा धितो लिलाम फुकुवा गर्नुपर्ने, भूमिहीन तथा वित्तिय शोषणका पीडितलाई मुआब्जाको व्यवस्था र प्रत्यक्ष निर्वाचित राष्ट्र प्रमुख हुनुपर्ने उनीहरुको माग छ ।