महाजात्राले दुई दिनमै कमायो तीन करोड, नयाँ रेकर्ड बनाउने अनुमान

शुक्रबारदेखि प्रदर्शनमा आएको नेपाली चलचित्र 'महाजात्रा'ले दुई दिनमा तीन करोड कमाएको छ । 

पाँच महिनायता नेपाली हलहरुमा छाएको सन्नाटा तोड्दै फिल्मले आक्रमक सुरुआत गरेको हो । लेखक तथा निर्देशक प्रदिप भट्टराईका अनुसार रिलिजको पहिलो दिन (शुक्रबार) एक करोड २३ लाख कलेक्शन गरेको महाजात्राले हिजो एक करोड ८३ लाख कमाई गरेको छ । 

आज पनि देशभरका हलहरुमा ९० प्रतिशत अकुपेन्सी देखिएको उनले बताएका छन् । आज होलीको सार्वजनिक विदा परेकाले चलचित्रलाई थप फाइदा हुने देखिन्छ । 

विश्वका ४१ देशमा प्रदर्शन भइरहेको चलचित्रले नेपालमा तीन सयको हाराहारीमा शो पाएको दावी गरिएको छ । कुनै पनि नेपाली चलचित्र यति धेरै देशमा एकैसाथ रिलिज भएको यो पहिलो पटक हो । यसकारण पनि महाजात्राको कमाईले नेपाली चलचित्रको इतिहास रच्ने अनुमान गरिएको छ । 

अहिलेसम्म सर्वाधिक कमाई गर्ने चलचित्रको पहिलो नम्बरमा 'कबड्डीः दी फाइनल म्याच' छ । यसले २१ करोड कमाएको थियो । दोस्रोमा 'छक्कपञ्जा-३' र तेस्रो नम्बरमा 'जारी' छ । यी दुई चलचित्रले क्रमश:  २० करोड र १८ करोड कमाएको थियो । 

रिलिजको पहिलो र दोस्रो दिनमा उत्साहजनक कमाई गरेको 'महाजात्रा'ले यी सबै रेकर्ड तोड्ने अनुमान गरिएको छ । 'महाजात्रा' 'जात्रा'को तेस्रो सिक्वेल हो । 'जात्रा'ले ४ करोड र अघिल्लो दोस्रो सिक्वेल 'जात्रैजात्रा'ले ११ करोड कमाएको बताइएको थियो । 

तीनवटै चलचित्रमा कलाकारहरु विपिन कार्की, वर्षा राउत, रवीन्द्र सिंह बानियाँ, रवीन्द्र झालगायतको अभिनय छ । महाजात्रमा हरिवंश आचार्यको पनि अभिनय छ ।  

गत कात्तिकमा रिलिज भएको चलचित्र 'दिमाग खराब'पछि कुनै पनि चलचित्रले हलमा उल्लेख्य मात्रामा दर्शक तान्न सकेका थिएनन् । त्यसयता एक दर्जन बढी चलचित्र प्रर्दशनमा आइसकेका छन् । तर, तीमध्ये दुई साताअघि रिलिज भएको 'अगस्त्यः च्याप्टर १' र साताअघि रिलिज भएको 'उपहार'ले मात्र आफ्नो लगानी उठाएको बताइन्छ । अन्य चलचित्रहरु भने फ्लपको सूचीमा दर्ज भइसकेका छन् । 

'हात्तीछाप'का निर्माताले त अन्तर्वार्तामै भनेका छन्, 'फिल्ममा फाइदा मात्र खोजेर हुँदैन । दर्शकहरुको माया नै ठूलो हो । तर, म निर्माता भएको हिसाबले लगानी सम्झदा त मन दुख्छ नै । एक करोड अझै घाटामा छु ।'