किम्फको २१ औं संस्करणमा २२ देशका ६० बढी चलचित्र

काठमाडौं अन्तर्राष्ट्रिय पर्वतीय चलचित्र महोत्सव (किम्फ) को २१ औं संस्करण पर्सिदेखि शुरु हुँदै छ । काठमाडौं महानगरपालिकाको सह–आयोजनामा हुन लागेको उक्त महोत्सव राष्ट्रियसभा गृह र नेपाल पर्यटन बोर्डमा सञ्चालन गरिने बताइएको छ । 

‘इकोज अफ चेञ्ज’ अर्थात् ‘परिवर्तनको प्रतिध्वनी’ नारा तय गरिएको महानगरले जनाएको छ । महोत्सवमा २२ देशका ६० भन्दाबढी चलचित्र प्रदर्शन हुने जनाइएको छ । 

किम्फको अन्तर्राष्ट्रिय प्रतियोगिताअन्तर्गत वृत्तचित्र, आख्यान (कथानक), लघु तथा प्रयोगात्मक चलचित्र समावेश छन् । नेपाल पानोरामा शीर्षकअन्तर्गत विगतमा जस्तै स्वदेशी प्रतिभाका रोमाञ्चक फिल्महरु प्रदर्शन हुनेछन् । 

यी चलचित्रले समकालीन नेपालको कथा उजागर गर्ने महानगरले जनाएको छ । महोत्सव इटालियन निर्देशक ब्रान्डो क्विलिचीको ‘द टाइगर्स नेस्ट’ को एसिया प्रिमियरबाट सुरु हुनेछ । 

नेपालमा छायाङ्कन गरिएको यो वृत्तचित्र एक युवाको कथा हो, जो बाघको बच्चालाई शिकारीबाट बचाउन देशव्यापी साहसिक यात्रामा निस्कन्छ । महोत्सव र यसअन्तर्गत प्रदर्शन हुने प्रस्तुतिका बारेमा किम्फ फाउण्डेसनकी अध्यक्ष रम्यता लिम्बुले भनिन्, ‘चलचित्र र कार्यक्रमका लाइन–अपबाट दर्शकहरूलाई मनोरञ्जन प्रदान गरिनेछ । यस्तै, नेपाली समाजलाई असर पार्ने विषयहरूमा आलोचनात्मक संवाद हुनेछ ।’

किम्फ २०२४ को मुख्य आकर्षण ‘एभरेष्ट रिभिजिटेड १९२४–२०२४’ शीर्षकमा एक शताब्दीका चलचित्र र सगरमाथा आरोहण प्रयासको दुर्लभ तस्बिरहरूको पनि प्रदर्शनी हुने जनाइएको छ । 

यसैबीच, नेपाल–कोरिया मित्रताको ५० औँ वर्षगाँठको अवसरमा भिन्न भाषा र संस्कृतिका दुई देशको समानता झल्कने उल्जु माउन्टेन फिल्म फेस्टिभल कोरियाका फिल्महरुको समेत विशेष प्रदर्शन गरिनेछ ।

महोत्सवको निर्णायक मण्डलमा बेलायतका निर्देशक–निर्माण डिना मुफ्ती, नेपालका मानवशास्त्री डा.सुरेश ढकाल, स्विट्जरल्याण्डका चलचित्र सम्पादक रेजिना बत्स्र्की छन् । प्रतियोगितामा अन्तर्राष्ट्रिय विधाका ३ वटा फिचर आख्यान, ११ वटा फिचर वृत्तचित्र, ७ वटा लघु आख्यान र ७ वटा लघु वृत्तचित्र तथा नेपाल पानोरमा विधाका १३ वटा वृत्तचित्र र १६ वटा आख्यान छन् । अन्य अप्रतियोगी प्रस्तुति पनि रहनेछन् ।

अन्तर्राष्ट्रिय विधामा सर्वोत्कृष्ट फिचर वृत्तचित्रलाई १५ सय अमेरिकी डलर, उत्कृष्ट लघु वृत्तचित्रलाई १ हजार डलर, उत्कृष्ट फिचर कथानक चलचित्रलाई १५ सय डलर र उत्कृष्ट लघु कथानक प्रस्तुतिलाई १ हजार डलर पुरस्कार प्रदान गरिनेछ ।

नेपाल पानोरमामा सर्वोत्कृष्ट वृत्तचित्र र उत्कृष्ट कथानक चलचित्रले क्रमशः एक लाख रुपैयाँ प्राप्त गर्नेछन् । यसैगरी, दर्शक पुरस्कारको राशी पनि एक लाख रुपैयाँ तोकिएको छ ।
 
महोत्सव नेपाल पर्यटन बोर्डको प्रवद्र्धनमा हुन लागेको हो । किम्फ इटालीको टुरिन सहरमा मुख्यालय रहेको इन्टरनेशनल एलायन्स अफ माउन्टेन फिल्म (आईएएमएफ) को सदस्य छ । 

आईएएमएफमा विश्वका विभिन्न २० देशका २८ संस्था सदस्य छन् । महोत्सवका चलचित्र हेर्न एक सय ५० रुपैयाँको टिकट तोकिएको छ । विद्यार्थीले भने परिचयपत्र देखाएर एक सय रुपैयाँ तिरे पुग्छ ।