दक्षिण एसियाका पहिलो कम्युनिष्ट प्रधानमन्त्रीको सम्झनामा ‘स्मृति सभा’

दक्षिण एसियाका पहिलो कम्युनिष्ट प्रधानमन्त्री तथा आदर्श नेता स्वर्गीय मनमोहन अधिकारीको १०४ औं जन्मजयन्ती विशेष कार्यक्रम गरेर मनाइएको छ । मुलुककै पहिलो प्राविधिक विश्वविद्यालय ‘मनमोहन प्राविधिक विश्वविद्यालय’ ले अधिकारीको योगदानको सम्झनामा स्मृति सभा आयोजना गरेको हो । 

मोरङको बूढीगंगा गाउँपालिका ४, हात्तीमुढास्थित विश्वविद्यालयले आयोजना गरेको कार्यक्रममा उपस्थित सबैले अधिकारीको राज्यप्रतिको योगदान अनुकरणी रहेकाले कहिल्यै बिर्सिन नहुने बताए । 

त्यसअघि विश्वविद्यालयका उपकुलपति डा.सुवाश्री पोखरेल, पूर्वमन्त्री जीवन घिमिरे, संरक्षण समिति सदस्य सत्यनारायण चौधरी, रजिष्ट्रार डा.दिलनाथ फुँयाल, डिन प्रा.डा. प्रचण्डमान प्रधान, कानुनी सल्लाहकार कोषराज न्यौपानेले अधिकारीको शालिकमा माल्यार्पण गरेका थिए । 

सो क्रममा उनीहरुले नेपाली राजनीतिमा निष्ठा र सदाचारको प्रतिक मानिँदै आएका अधिकारीको आदर्श, सिद्धान्त र मूल्य मान्यतालाई पालना गर्नुपर्नेमा जोड दिए । वि.सं. १९७५ असार १५ गते राजधानीको लाजिम्पाटमा पिता रामचन्द्र अधिकारी र माता पूर्णकुमारी अधिकारीको माइला छोराका रुपमा जन्मिएका अधिकारीले २००३ मा विराटनगरमा भएको मजदूर आन्दोलनको नेतृत्व गरेका थिए । धेरै राजनीतिक संघर्ष गरेका उनले १७ वर्ष जेलमा बिताए । 

२०५१ को मध्यावधि निर्वाचनपछि नौ महिना प्रधानमन्त्रीको कार्यभार सम्हालेका अधिकारीले ‘आफ्नो गाउँ आफैं बनाऊँ’ र वृद्धभत्ता कार्यक्रमको प्रारम्भ गरेका थिए । त्यसपछि उनको लोकप्रियता झन् चुलिएको हो । प्राविधिक जनशक्तिको उत्पादनमा जोड दिएका उनको निधन २०५६ वैशाख १३ गते चुनाव प्रचारप्रसारका क्रममा काठमाडौंमा हृदयाघातबाट भएको हो । 

अधिकारीको सम्मानमा भारत सरकारले मनमोहन स्मृति प्रतिष्ठानलाई प्राविधिक विश्वविद्यालय बनाएर सञ्चालनमा ल्याउन सहयोग पुर्याएको छ । उक्त विश्वविद्यालयमा स्कुल अफ इन्जिनियरिङ, स्कुल अफ मेडिकल र स्कुल अफ एप्लाइड हेल्थ स्थापना भएर सञ्चालनमा आएको छ । 
विश्वविद्यालयले आगामी १० वर्षमा मुलुकभित्र आवश्यक प्राविधिक जनशक्ति उत्पादन गर्न स्नातकदेखि विद्यावारिधिसम्मको कक्षा सञ्चालन गर्ने योजना बनाएको छ ।