संघीय संसद भवनका इञ्जिनियरकै प्रमाणपत्र नक्कली

काठमाडौंको नयाँ बानेश्वरस्थित अन्तर्राष्ट्रिय सम्मेलन केन्द्र विकास समितिमा कार्यरत इलेक्ट्रोनिक्स इञ्जिनियर जीवनप्रसाद अधिकारीविरुद्ध नक्कली शैक्षिक योग्यतासम्बन्धी आरोपपत्र दायर भएको छ । 

अख्तियार दुरुपयोग अनुसन्धान आयोगले विशेष अदालत काठमाडौंमा उनीविरुद्ध मुद्दा दर्ता गरेको हो । उनले भारतको कोलकतास्थित द इन्स्टिट्युसन इन्जिनियर्सबाट इलेक्ट्रोनिक्स र सञ्चार इन्जिनियरिङ पास गरेको जनाउँदै नक्कली शैक्षिक योग्यताको प्रमाणपत्र पेश गरेर समितिको इलेक्ट्रोनिक्स ओभरसियर साउण्ड पदमा नियुक्ति लिएको अख्तियारको दाबी छ । 

हालसम्म उक्त पदमा रहेर सरकारी ओहोदा, लाभ र सुविधा प्राप्त गरेको भन्दै भ्रष्टाचार निवारण ऐन, २०५९ को दफा १६ बमोजिम कैद र जरिवाना सजायको मागदाबीसहित मुद्दा दर्ता गरिएको हो ।