समाचार हटाउन माग गर्दै आरजुका स्वकीय सचिव प्रेस काउन्सिलमा

पूर्वप्रधानमन्त्री शेरबहादुर देउवापत्नी एवं सांसद आरजु राणाको नाम जोडेर समाचार प्रकाशन गर्ने सञ्चारमाध्यमलाई कारबाही गर्न माग गर्दै प्रेस काउन्सिलमा उजुरी परेको छ । स्वकीय सचिव कमल रावलले नौ वटा सञ्चारमाध्यमविरुद्ध आज काउन्सिलमा उजुर हालेका हुन् । 

उजुरी पर्नेमा योहो टेलिभिजन एचडी, सगरमाथा टिभी,न्यूज २४ नेपाल, प्राइम टाइम्स एचडी, कान्तिपुर टिभी एचडी, एकता टिभी नेपाल, नेपाली खबर टिभी, खोजीनीति खबर,कलर अफ नेपाल छन्  । 

आरजुको चरित्रहत्या गर्ने मनशायले भ्रामक समाचार प्रकाशित गरेको उल्लेख गर्दै उनले ती सामग्री हटाउन माग गरेका छन् । त्यस्तै, ती मिडियाका सम्पादक, प्रकाशक र समाचार लेख्ने सञ्चारकर्मीलाई कारबाही गर्न भनिएको छ ।

दर्ता नम्बर ५१७८ भएको उजुरीपत्रमा लेखिएको छ,‘उपरोक्त सम्बन्धमा माननीय आरजु राणा देउवालाई जोडेर प्रकाशन–प्रशारण भएका समाचारहरु तथ्यहीन, भ्रामक र उहाँको चरित्रहत्या गर्ने मनसायले प्रकाशित भएकाले यसका सम्पादक, प्रकाशक र समाचार तयार गर्ने सञ्चारकर्मीहरुलाई कानुनअनुसार कारबाही गरी उक्त भ्रामक समाचार हटाउन निर्देशन दिन अनुरोध गर्दछु ।’