भोले बाबाको खुट्टा छुने रहरमा १३४ जनाको गयो ज्यान

भारतको उत्तर प्रदेशमा आयोजित एउटा सत्संग कार्यक्रममा भागदौड मच्चिदा सयौँको ज्यान गएको छ । 

हाथरस जिल्लाको सिकन्दराउनजिकै हिजो आयोजित कार्यक्रममा एकाएक भागदौड हुँदा १३४ जनाले ज्यान गुमाएका हुन् । मृतकको संख्या अझै बढ्ने अनुमान गरिएको छ भने हजारौँ भक्तजन घाइते भएका छन् । यो घटनाका कारण यतिबेला उत्तर प्रदेश नै शोकमा डुबेको भारतीय मिडियाहरुले जनाएका छन् । 

घटना विवरणअनुसार सत्संग कार्यक्रममा डेढ लाखभन्दा बढी भक्तजन उपस्थित थिए । कार्यक्रम दिउँसो १२ बजेवास शरु हुने भनिएको थियो । तर, प्रवचक नारायण साकार हरि उर्फ भोले बाबा भने साढे १२ मात्र कार्यक्रमस्थल पुगे । करिब १२:५५ मा भोले बाबाले प्रवचन दिन शुरु गरेको नवभारत टाइम्सले जनाएको छ । 

प्रवचन शुरु भएसँगै भक्तजनहरु स्टेजमा पुगेर भोलेबाबाको पाउ छुन बलजफ्ती गरिरहेका थिए, जसलाई नियन्त्रणमा लिन तैनाथ सुरक्षाकर्मीलाई हम्मे-हम्मे पर्यो । माहोल अनियन्त्रित बन्दै गएपछि भोले बाबाले करिब ५० मीनेटमात्र प्रवचन दिएर निस्किए । 

उनी बाहिरिएसँगै भक्तजनहरु पनि पछि-पछि दौडिन थाले । प्रहरीले उनीहरूलाई रोक्न प्रयास गरिरहेको थियो ।  तर, कार्यक्रमको मैदानबाट बाहिर निस्कने गेट साँघुरो भएका कारण मानिसहरु एकमाथि अर्कोलाई टेकेर दौडिन थाले । अवस्था यस्तो बन्यो कि, उनीहरुलाई नियन्त्रणमा लिने क्रममा आधा दर्जन प्रहरीसमेत भागदौडमा घाइते भए । 

बाहिर निस्कने गेट नजिकै एउटा नाला थियो । भागदौड मच्चिदा हजारौ मानिस उक्त नालामा खसे । जसको कारण अहिलेसम्म १३४ को मृत्यु भइसकेको छ । मृत्यु हुनेमध्ये अधिकांश महिला छन् भने एक दर्जन बालबालिका रहेको बताइएको छ । विवरणअनुसार हजारौँ मानिसको उद्धार गरेर अहिले उपचारको लागि अस्पताल पठाइएको छ । 

उता कार्यक्रममा छोटो प्रवचन दिएर निस्केका भोले बाबा भने घटनापछि सम्पर्कविहीन रहेको समाचारमा उल्लेख छ । भारतीय प्रधानमन्त्री नरेन्द्र मोदीले आज बिहान घटनाप्रति दु:ख व्यक्त गरेका छन् । मृतकप्रति श्रद्धाञ्जली व्यक्त गर्दै उनले पीडित परिवारलाई राष्ट्रिय राहत कोषबाट दुई लाख ५० हजार राहत उपलब्ध गराइने पनि घोषणा गरेका छन् ।