प्रधानमन्त्रीले पद नछोडेकोमा केपी ओली क्रुद्ध, कांग्रेसलाई धन्यवाद

नेपाली काँग्रेससँग मिलेर सरकारको नेतृत्व लिने तरखरमा रहेको नेकपा एमालेले प्रधानमन्त्री पुष्पकमल दाहाल प्रचण्डसँग पुन: राजीनामा मागेको छ । 

'राष्ट्रिय सहमतिको सरकार' का नाममा प्रधानमन्त्रीलाई पद छोड्न आग्रह गर्दै आएको उसले आज संसदीय दलको बैठक राखेर मार्गप्रशस्त गर्न भनेको हो । संघीय संसद भवनमा बसेको दलको बैठकले प्रधानमन्त्री प्रचण्ड अल्पमतमा परिसकेकाले आजै राजीनामा दिएर नयाँ सरकार गठनका लागि बाटो खोल्नुपर्ने निष्कर्ष निकालेको छ । 

प्रधानमन्त्री प्रचण्डले भने असार २८ गते विश्वासको मत लिने तयारी गर्नुभएको छ । एमालेले विश्वासको मतको विपक्षमा मतदान गर्ने निर्णय गरेको संसदीय दलका प्रमुख सचेतक महेश बर्तौलाले बताए । 

बैठकले नयाँ सरकार गठनका लागि काँग्रेससँग भएको समझदारीको स्वागत गर्दै यसमा महत्वपूर्ण भूमिका खेलेकोमा काँग्रेसलाई धन्यवादसमेत दिएको छ । ‘काँग्रेससँगको समझदारीलाई संसदीय दलले स्वागत गरेको छ । र यस महत्वपूर्ण प्रक्रियामा सहभागी भएर मुलुकलाई स्थायित्व, स्थिरता दिनेतर्फ, विकास, समृद्धि र सुशासनको बलियो स्थिर सरकार बनाउने प्रक्रियामा नेपाली काँग्रेसले जुन महत्वपूर्ण भूमिका निर्वाह गर्यो, यसप्रति नेकपा एमालेको यस संसदीय दलको बैठकले काँग्रेसलाई धन्यवाद दिने निर्णय गरेका छौं', बर्तौलाले भने ।