पूर्वराजाले पुनः गद्दी आरोहण गर्नेमा राप्रपा उपाध्यक्ष विश्वस्त
पूर्वपञ्चहरुको पार्टी राप्रपा उपाध्यक्ष रवीन्द्र मिश्रले पूर्वराजा ज्ञानेन्द्र शाह छिट्टै गद्दीमा फर्किने विश्वास गरेका छन् ।
वैकल्पिक राजनीतिको धार छाडेर गत आमनिर्वाचनअघि राप्रपा छिरेका उनले मुलुकको पछिल्लो राजनीतिक घटनाक्रमले राजसंस्था पुनस्र्थापित हुने आशा थप जगाएको बताएका हुन् । पूर्वराजा शाहको ७८औँ जन्मदिनको उपलक्ष्यमा शुभकामना दिँदै मिश्रले ज्योतिषीहरुले पनि त्यसै भनेको जानकारीसमेत गराए ।
देशको विकास र समृद्धिका लागि राजा, राजनीतिक दल र जनताबीच ‘नवीन समझदारी’ गर्नुपर्ने तर्क राख्दै आएका उनले यस्तै अवस्था रहे भड्खालोमा पर्ने दाबी गरेका छन् । ज्योतिषहरुले पनि यहि वर्ष राजसंस्था फर्किने भविष्यवाणी गरेको र राजनीति पनि त्यहि दिशामा अघि बढिरहेको उनको भनाई छ ।
पूर्वराजा ज्ञानेन्द्रको फोटो सेयर गर्दै उनले फेसबुकमा लेखेका छन्, ‘जन्मदिनको शुभकामना ! ज्योतिषीहरू भन्छन् ः २०८१–८२ सालभित्र नेपालमा राजसंस्था पुनस्र्थापित हुन्छ । राजनीति त्यही दिशामा अघि बढिरहेको प्रतित हुन्छ ।’
संविधान संशोधन गर्ने काँग्रेस र एमालेबीच हालै भएको समझदारीको राप्रपाले स्वागत गरेको छ । राजसंस्था र हिन्दु राष्ट्रको एजेण्डामा राजनीति गर्ने उक्त पार्टी त्यस अनुकूल परिस्थिति सृजना गराउन सरकारमा जाने तयारीमा रहेको बताइन्छ ।
टिप्पणीहरू