प्रधानमन्त्रीलाई जिबीरुपी च्याउले जोगाउन नसक्ने एमाले सांसदको दाबी

नेकपा एमालेका सांसद दयालबहादुर शाहीले प्रधानमन्त्री पुष्पकमल दाहाल प्रचण्डसँग ‘हिट एण्ड रन’को सिद्धान्त भएको बताएका छन् । 

प्रतिनिधिसभाको आजको बैठकमा बोल्दै उनले प्रधानमन्त्रीले नेपाली काँग्रेस र एमालेलाई ‘हिट’ पछि ‘रन’ गरेको भन्दै कटाक्ष गरेका हुन् । ‘उहाँ (प्रचण्ड) काँग्रेस र एमालेसँग रिसाउनुहुन्छ, उहाँसँगै हिट एण्ट रनको सिद्धान्त छ’, शाहीले भने, ‘०७२ यतामात्रै उहाँले चार पटक काँग्रेस र तीन पटक एमालेलाई हिट गर्नुभयो, त्यसैको उपज हो अहिले ।’ 

प्रधानमन्त्री प्रचण्डलाई विद्रोही धर्मबारे अध्ययन गर्न पनि उनले आग्रह गरे । ‘विद्रोही धर्म के हो ? विपक्षी धर्म के हो ? राम्रोसँग पढ्नुस् । छेउछाउमा अलि पढेका मान्छे राख्नुस्’, उनले सुनाए । 

सांसद शाहीले जिबी राईको जंगलमा उम्रेका च्याउहरुले प्रधानमन्त्रीलाई जोगाउन नसक्ने पनि बताए । राष्ट्रिय स्वतन्त्र पार्टीप्रति लक्षित गर्दै उनले भने, ‘प्रधानमन्त्रीज्यूसँग एउटा डुब्न लागेको जहाज छ, त्यसलाई बचाउन महाभारतको दुर्योधनजस्तै खोज्दै हुनुहुन्छ । तर जिबीको फोहोरमा उम्रेका च्याउहरुले त्यो थाम्न सक्दैनन् ।’