पश्चिमाले पेलेकै हुन् त यसपटक ?

एकातिर एमालेसँग सत्ता साझेदारीको सहमतिपत्रमा हस्ताक्षर गर्नुअघि हत्तपत्त पदाधिकारी बैठक राखेर कांग्रेसले चिनियाँ परियोजना बिआरआई नलिने निर्णय गर्नु, अर्कोतिर एमाले सचिवालय बैठकमा भारतीय राजदूतले नयाँ गठबन्धन भाँड्न खोजेको ब्रिफिङ हुनु ! के वर्तमान सत्ता गठबन्धन दुई छिमेकी भारत र चीनको प्रतिकूल छ ? के नेपालको सत्ता राजनीतिमा पश्चिमा शक्ति हावी भएका हुन् ? कांग्रेस–एमाले गठबन्धन बनाउने सूत्रधारमध्येका एक नेताले यसबारे गम्भीर खुलासा गरेको उच्च स्रोतले जानकारी दिएको छ ।

सूचना स्रोतले बताएअनुसार एमाले महासचिव शंकर पोखरेलले निकटहरूसँग हालैको यौटा छलफलमा अमेरिकी चासो यो गठबन्धनमा राम्रैसँग प्रकट भएको र त्यसमा आफूले पनि भूमिका खेलेको दाबी गरेका हुन् । दुई दलीय प्रणालीको वकालतकर्तासमेत रहेका उनले विश्वासपात्रसँग भने–यो सरकार यसरी बन्नुमा मेरो पनि मिहिनेत छ । अब इण्डिया र चाइनालाई पनि विश्वासमा लिएर अगाडि जाने हो । 

तर, यो कुरा शंकरका विश्वासपात्रसँग मात्र सीमित रहेन । महासचिवसँगको उक्त छलफलमा सहभागीमध्येका एक जनाले त्यसप्रति असन्तुष्टि जनाउँदै उपाध्यक्षमध्येका एकलाई जस्ताको तस्तै सुनाए । वाम सहकार्यको पक्षमा रहँदै आएका ती नेताले सोधे – ‘शंकरजी अहिलेको सरकार बन्नमा अमेरिकी योगदान रहेको भन्नुहुन्छ के हो कुरा ?’

तर, आफैँ अनभिज्ञ रहेका ती उपाध्यक्ष नाजवाफ भए । असार १७ गते मध्यराति कांग्रेस–एमालेबीच सात बुँदे सहमति हुनु केही घण्टाअघिसम्म अध्यक्ष ओली र महासचिव शंकरबाहेक पदाधिकारी तहका नेतालाई समेत सो को सुइँको दिइएको थिएन । १८ गते बिहानसम्म नेताहरू अलमलमै देखिन्थे । यद्यपि, त्यसदिन दिउँसो बसेको सचिवालय बैठकले सहमति अनुमोदन ग¥यो । तर, वाम सहकार्य तोडेर कांग्रेससँग मिल्नुको कारण र औचित्यबारे बैठकमा प्रश्न भने उठेको थियो । 

गत बिहिबार बसेको सचिवालय बैठकमा पनि त्यस्तै प्रसंग चल्यो । सचिव योगेश भट्टराईले बिआरआईबारे जिज्ञासा राख्दै बाह्य शक्ति केन्द्रको चासोबारे अध्यक्ष तथा प्रधानमन्त्रीसँग सांकेतिक प्रश्न गरेका थिए ।

‘कांग्रेस बिआरआईप्रति सकारात्मक छैन भन्छन्, अब यसमा सरकारले के गर्छ ?’, उक्त प्रश्नमा ठोस जवाफ नदिएका ओलीले भन्नुभयो, ‘कांग्रेसलाई पनि मनाएर हाम्रो राष्ट्रिय हितअनुसार लिनुपर्छ । चिनियाँहरूले बढी हल्लाखल्ला गरेकाले कांग्रेस भड्किएको हो । खालि बिआरआई भनेर कराउँछन्, चुपचाप सम्झौतामा हस्ताक्षर गर्दा भैहाल्छ नि !’ ओलीको भनाइ थियो । 

यता, राष्ट्रिय राजनीति आफ्नो लाइनअनुसार अघि बढाउन सफल भएका महासचिव शंकर अब पार्टी नेतृत्व आफूतिर आउनेमा ढुक्क देखिन्छन् । स्रोतका अनुसार अध्यक्ष ओली र पूर्वराष्ट्रपति विद्यादेवी भण्डारी ‘भिडेको खण्डमा’ आगामी महाधिवेशनपछि आफू निर्विकल्प अध्यक्ष बन्न सकिने उनको आकलन छ ।

‘केपी र विद्या दुबै जना अध्यक्षमा लड्न खोज्दा कुरा मिल्दैन अनि म साझा उम्मेदवार हुन्छु !’, शंकरले निकटस्थहरूलाई यस्तो योजना सुनाएकोमा पूर्वराष्ट्रपति भण्डारीनिकट एक नेताबाट कुरा फुत्किएको बताइन्छ ।

त्यसो त, माधव नेपाल, झलनाथ खनाल, वामदेव गौतमसहित ठूलो संख्यामा संस्थापक नेता बाहिरिएपछि अध्यक्ष ओलीमा सर्वाधिकार रहँदै आएको एमालेको आन्तरिक शक्ति सन्तुलन क्रमशः खल्बलिँदै छ । भनिँदै छ, पूर्वराष्ट्रपति भण्डारी पार्टीमा सक्रिय हुँदा अर्को कार्यकाल अध्यक्ष बन्ने तयारीमा रहेका ओलीमाथि चुनौती थपिने खतरा छ । त्यसलाई रोक्न ओलीले पछिल्लो कार्य विभाजनमा एकलौटी गरेको पूर्वराष्ट्रपति भण्डारी निकटहरूको बुझाइ छ ।

पार्टीमा ५० प्रतिशत पकड रहेको भनिएकाले आगामी महाधिवेशनलाई हेरेर अध्यक्षले आफूलाई सजिलो हुनेगरी कार्य विभाजन गरेको एक नेताले बताए ।

(साभार:जनआस्था साप्ताहिकबाट)