गाउँ घुमेको रिपोर्ट सोझै प्रचण्डलाई

प्रमुख प्रतिपक्ष नेकपा माओवादी केन्द्रका सांसद तथा पूर्व पर्यटन मन्त्री सुदन किरातीले अध्यक्ष पुष्पकमल दाहाल प्रचण्डसँग 'ग्रामीण अनुभव' शेयर गरेका छन् । हिजो बिहान अध्यक्ष निवास खुमलटार पुगेर उनले आठ दिन लामो गाउँ घुमाई र प्राप्त अनुभव सुनाएका हुन् । 

साउन २१ गते काठमाडौँबाट निस्किएका  किराती पूर्वका झापा,मोरङ र सुनसरीका विभिन्न ग्रामीण भेग पुगेका थिए । त्यस दौरान माओवादीप्रति स्थानीय जनताको धारणा नजिकबाट बुझेको उनले बताएका छन् । 

 अस्ति साँझ काठमाडौँ फर्किएका किरातीले हिजो बिहान अध्यक्ष प्रचण्डलाई भेटेर पूर्वी गाउँहरुमा माओवादीप्रति जनताको धारणाबारे अवगत गराएको जानकारी दिए । माओवादी ध्रुवहरु एकता गरेर अघि बढ्न जनताबाट प्राप्त सुझाव उनले अध्यक्षलाई सुनाए ।

त्यस्तै,विचार निर्माण तथा परिमार्जन र संगठन विस्तारको लागि माओवादीले राम्रा कार्यक्रम बोकेर देशभरि अभियान चलाउनुपर्ने सुझाव पनि जनताले दिएको किरातीले बताए । पूर्वी जिल्लाहरुको पूर्वाधार,अर्थतन्त्र र शैक्षिक विकासको अवस्थाबारे पनि प्रचण्डलाई जानकारी गराएका थिए । 

अध्यक्ष प्रचण्डले पनि एक सातादेखि जारी स्थायी समिति बैठकमा विचार निर्माण,संगठन विस्तारलगायतका विषयमा घनिभूत छलफल भइरहेको सांसद किरातीलाई अवगत गराएको जनाइएको छ ।