रविसँग बयान लिने संसदीय छानबिन समितिको तयारी, मेयरले पठाए चिठी

सहकारी ठगी प्रकरण छानबिन गर्न बनेको संसदीय समितिले राष्ट्रिय स्वतन्त्र पार्टीका सभापति रवि लामिछानेसँग बयान लिने भएको छ । पूर्व गृहमन्त्री समेत रहेका लामिछानेलाई समितिले आगामी शुक्रबारको बैठकमा उपस्थित हुन आदेश दिएको बताइएको छ । 

त्यसदिनको बैठकमा गोर्खा मिडियाका प्रारम्भकालीन सञ्चालक छविलाल जोशीलाई पनि बोलाउने समितिको तयारी छ । उनको आमाको १३ दिने काजक्रिया चलिरहेकाले भदौ ७ गतेको बैठकमा आमन्त्रण गरिएको हो ।

सहकारी ठगी प्रकरणका हाल फरार मुख्य नाइके जिबी राई, लामिछाने र जोशीले ग्यालेक्सी फोरके टेलिभिजनमा पोखराको सूर्य दर्शन, चितवनको सहारा, बुटवलको सुप्रिमसहित विभिन्न ठाउँका सहकारीबाट गैरकानुनी रुपमा रकम ट्रान्सफर गरेको देखिन आएको छ ।  

समितिले रास्वपाका सहमहामन्त्री विपिन आचार्यसँग हिजो बयान लिएको हो । उनी गोर्खा मिडियाको तत्कालीन क्रियटिभ डाइरेक्टर हुन् । सहकारीको रकम हिनामिनामा उनी पनि संलग्न रहेको पाइएपछि समितिले बैठकमा बोलाएर सोधपुछ गरेको थियो ।

पोखरा र बागलुङमा रहेको इमेज सहकारीका सञ्चालक देवकुमार नेपाली समितिको सम्पर्कमा आएका छन् । ढोरपाटन नगरपालिकाका मेयर समेत रहेका उनी पनि बचतकर्ताको अर्बौ रुपैयाँ हिनामिना गरेर फरार भएका हुन् । तर उनले हुलाकबाट चिठ्ठी पठाएर समितिलाई फर्किने वातावरण बनाइदिन आग्रह गरेको समिति सभापति सूर्य थापाले बताए । 

विदेशमा रहेका उनले लेखेको पत्रमा आफू स्वदेश फर्किएर काम गर्न चाहेको र क्रमशः बचतकर्ताको रकम फिर्ता गर्ने दाबी गर्दै त्यसको लागि वातावरण बनाइदिन समितिलाई आग्रह गरिएको हो  ।