सानो भनिएकोमा माधवको चित्त दुःखाई, दुई वर्षमा ठूलो बनाउने झलनाथको दाबी

नेकपा एकीकृत समाजवादीका अध्यक्ष माधवकुमार नेपालले पार्टी सानो हुँदैमा हीनताबोध गर्न नहुने बताउनुभएको छ । केन्द्रीय कमिटी बैठकलाई सम्बोधन गर्दै उहाँले सानो पार्टी भनेर धेरै गीत गाइरहनु जरुरी नरहेको बताउनुभयो । यो कुरा सुन्दा सुन्दा आफू दिक्क भएको उल्लेख गर्दै अध्यक्ष नेपालले नेताहरुलाई यस्तो हीनताबोधमा नबस्न आग्रहसमेत गर्नुभयो ।

केही वामपन्थी पार्टीको नाम लिँदै उहाँले प्रश्न गर्नुभयो, ‘के सानो पार्टी ? मजदुर किसान पार्टीभन्दा सानो छ ? मोहनविक्रमजीको पार्टीभन्दा सानो छ ? मोहन वैद्यको पार्टीभन्दा सानो छ ? विप्लवजीहरुको पार्टीभन्दा सानो छ ?’ 

अध्यक्ष नेपालले आगामी मंसिरमा हुने भनिएको उपचुनावको तयारीमा लाग्न केन्द्रीय सदस्यहरुलाई निर्देशन दिनुभएको छ । 

बैठकमा धारणा राख्दै सम्मानित नेता झलनाथ खनालले एकीकृत समाजवादीलाई अबको एक–दुई वर्षमै एमालेभन्दा ठूलो बनाउन सकिने दाबी गर्नुभएको छ । त्यसको योजना सुनाउँदै उहाँले भन्नुभयो, ‘एमालेको अध्ययन गर्दा साढे तीन लाख सदस्य रहेछन् । हाम्रा डेढ लाख होइनन् त कमरेड ? सबैले आफ्नो जिल्लाका पार्टी सदस्यहरुको ग्यारेन्टी लिन सक्नुहुन्छ नि ? सक्नुपर्छ ।’

अहिले भएका पार्टी सदस्यहरुले नयाँ एक जना सदस्य बनाउन सके दुई वर्षभित्र ठूलो पार्टी बन्ने उहाँको भनाई छ । ‘हामीले मेहनतपूर्वक काम गर्यौँ भने ती सदस्यले अर्को एक जना सदस्य बनाउन सक्छन्, हामीले एकदेखि दुई वर्षको बीचमा तीन लाख पार्टी सदस्य बनाउन सक्छौं’, खनालले भन्नुभयो । 

नेपाली काँग्रेस र एमालेलाई खनालले भ्रष्ट पार्टीको संज्ञा दिनुभएको छ । ‘अहिले दुई वटा पार्टीको सरकार बनेको छ । यी दुई घमण्डी पार्टीहरू हुन् । भ्रष्ट पार्टीहरू हुन् र, अवसरवादी हुन् । एउटा त प्रतिक्रियावादी दलाल पुँजीवादको प्रतिनिधि नै भइहाल्यो । अर्को घोर अवसरवादी दक्षिणपन्थी नेतृत्व भएको पार्टी हो’, उहाँले भन्नुभयो । 

खनालले काँग्रेस–एमाले गठबन्धनलाई दलाल पुँजीवाद र दक्षिणपन्थी अवसरवादको गठबन्धन भन्नुभएको छ ।