यचुरीको अन्तिम संस्कारमा सहभागी हुन एमाले उपाध्यक्ष भारत जाँदै

भारतीय कम्युनिष्ट पार्टी (माक्र्सवादी)का महासचिव सीताराम यचुरीको अन्तिम संस्कारमा सहभागी हुन नेकपा एमालेका वरिष्ठ उपाध्यक्ष इश्वर पोखरेल भारत जाने भएका छन् । आज बसेको सचिवालय बैठकले पोखरेललाई भारत पठाउने निर्णय गरेको छ । 

७२ वर्षीय यचुरीको हिजो निधन भएको थियो । तीन साताअघि मात्रै उनी अल इन्डिया इन्स्टिच्युड मेडिकल साइन्स (एम्स) दिल्लीमा भर्ना भएका थिए । निधनपछि येचुरीको परिवारले शव अल इण्डिया इन्स्टिच्युट मेडिकल साइन्स (आइम्स) लाई नै डोनेट गरेको छ । 

आइम्सले जारी गरेको विज्ञप्तिमा भनिएको छ, ‘हामी उहाँको निधनप्रति दुःखी छौ । उहाँको परिवारले यचुरीको शव हामीलाई डोनेट गर्नुभएको छ । उहाँको शव आधुनिक शिक्षण र शल्यक्रियाको अनुसन्धानमा प्रयोग हुनेछ ।’ 

यचुरीकी पत्नी सीमा चिश्ती पत्रकार हुन् । छोराको भने कोभिड महामारीमा निधन भएको थियो । नेकपा माओवादी केन्द्रका महासचिव देव गुरुङ आज बिहान दिल्ली गएका छन् । उनी यचुरीको अन्तिम संस्कारमा सहभागी हुन गएको अनुमान गरिएको छ ।