दुर्गा प्रसाईंका कार्यकर्ता मसाल जुलुसको तयारीमा
विवादित मेडिकल व्यवसायी तथा राजावादी अभियन्ता दुर्गा प्रसाईं नेतृत्वको राष्ट्र, राष्ट्रियता, धर्म संस्कृति तथा नागरिक बचाऊ महाअभियानले बृहत प्रदर्शनको घोषणा गरेको छ । काठमाडौं जिल्ला अदालतबाट प्रसाईंसहित तीन जनाविरुद्ध पक्राउ पूर्जी जारीको विरोधमा आजबाट चरणबद्ध आन्दोलन गर्न लागिएको जानकारी दिइएको छ ।
आज देशैभर विरोध सभा र राँकेजुलुस कार्यक्रम राखिएको छ । भोलिदेखि चक्काजाम, विरोध सभा र धर्नालगायतका कार्यक्रम गरिने महाअभियानद्वारा आज जारी विज्ञप्तिमा उल्लेख छ ।
‘आज मिति २०८१ असोज ३ गते देशैभर विरोध सभा, राँकेजुलुस, विरोध प्रदर्शन र भोलि मिति २०८१ असोज ४ गतेबाट देशैभर चक्काजाम, विरोध सभा, धर्नालगायतका कार्यक्रम अघि बढाउनुहुन सबै नगर, जिल्ला, अञ्चल तथा केन्द्रीय पदाधिकारीज्यूहरुलाई यसै विज्ञप्तिमार्फत् हार्दिक आह्वान गर्दछौं’,विज्ञप्तिमा उल्लेख छ ।
अदालतले हिजो प्रसाईंसहित सञ्चारकर्मी प्रकाशचन्द्र दाहाल र जीवन पाण्डेविरुद्ध पक्राउ पूर्जी जारी गरेको छ । प्रसाईंविरुद्ध साइबर ब्यूरोमा उजुरी परेपछि विद्युतीय कारोबार ऐनको कसूरमा अनुसन्धानका लागि प्रहरीले अनुमति मागेको थियो ।
टिप्पणीहरू