विवादित राजदूतहरु अनुमोदित, रास्वपासहित सत्तापक्षकै फरक मत

संसदीय सुनुवाई समितिले विभिन्न देशका लागि यसअघि सरकारले प्रस्ताव गरेका १७ राजदूतमध्ये १६ जनाको नाम अनुमोदन गरेको छ । आज बसेको संसदीय सुनुवाई समितिको बैठकले विभिन्न देशका लागि प्रस्तावित १७ राजदूतमध्ये एक जनाको नाम अनुमोदन हुन सकेन ।

समिति सभापति ईश्वरीदेवी न्यौपानेका अनुसार उजुरीकर्ताहरुको उजुरी, प्रश्तावित राजदूतको स्पष्टिकरण, कार्ययोजनाका आधारमा श्रीलंकाका लागि प्रस्तावित राजदूत रामकृष्ण भट्टराई बाहेक अरुको नाम बहमुतले अनुमोदन गरिएको छ । भट्टराईका शैक्षिक योग्यताका प्रमाणपत्रहरु अपुरो भएको देखिएपछि बैठकलाई सचिवालयलाई त्यसबारे तोकिएका शैक्षिक प्रमाणपत्र मगाउन निर्देशन दिएको छ ।

राष्ट्रिय स्वतन्त्र पार्टीका डोलप्रसाद अर्यालले इजरायलका लागि प्रस्तावित राजदूत प्राध्यापक धनप्रसाद पण्डित, दक्षिण अफ्रिकाका लागि प्रश्तावित राजदूत प्रा.डा. कपिल श्रेष्ठ र मलेसियाका लागि प्रस्तावित डा. नेत्रप्रसाद तिमल्सिनामाथि फरक मत राखेका छन् । 

जनता समाजवादी पार्टी, नेपालका सांसद प्रकाश अधिकारीले भारतका लागि प्रस्तावित राजदूत शंकर शर्माको नाममा फरक मत राखेका छन् ।

अर्यालले इजरायलका लागि प्रस्तावित राजदूत प्राध्यापक धनप्रसाद पण्डित, दक्षिण अफ्रिकाका प्रा.डा. कपिल श्रेष्ठ र मलेसियाका डा. नेत्रप्रसाद तिमल्सिनाको उच्च नैतिक चरित्र नभएकाले अनुमोदन गर्न नहुने भन्दै फरक मत राखेको बताइएको छ । सांसद अधिकारीले भने भारतका लागि प्रस्तावित राजदूत शंकर शर्मालाई दोहोर्याइएकोमा फरक मत राखेका हुन् । 

चारै जनाविरुद्ध समितिमा उजुरीसमेत परेको थियो।