सेनाको पर्वतीय परेड सम्पन्न, विदेशीसहित २३ जना काठमाडौँ फिर्ता

नेपाली सेनाले जोमसोममा आयोजना गरेको ४० दिन लामो पर्वतीय युद्धकला तालिम आज सम्पन्न भएको छ । 

जोमसोममा तैनाथ सेनाको उच्च शिखर शिक्षालयमा गत साउन २७ गतेदेखि शुरु भएको तालिममा ११ विदेशीसहित ८० सैनिकले भाग लिएका थिए । पहाडी युद्धकलाका साथै रक क्राफ्ट‚ आइस क्राफ्टसम्बन्धी ज्ञान दिलाउने उद्देश्यले सेनाले यस्तो तालिम संचालन गर्दै आएको छ । 

उपरथी ध्रुवप्रकाश शाहसहितले तालिम समापनसँगै अन्तिम प्रवचन दिएको सैनिक जनसम्पर्क निर्देशनालयले जनाएको छ । आज बिहानै त्रिभुवन अन्तर्राष्ट्रिय विमानस्थल मध्यएयर वेशबाट एमआई-१७ हेलिकप्टरमा उपरथी शाहसहित १२ जना जोमसोम पुगेका थिए ।  

११ जना विदेशी र १२ नेपाली सेनासहित २३ जनाको टोली सोही हेलिकोप्टरमा दिउँसो काठमाडौँ फर्किएको छ ।