दुर्गा प्रसाईंका समर्थकहरुद्वारा भारतीय ट्रकमा आगो लगाइएको प्रचार
राजावादी अभियन्ता तथा विवादास्पद मेडिकल व्यवसायी दुर्गा प्रसाईं नेतृत्वको ‘राष्ट्र, राष्ट्रियता, धर्म, संस्कृति र नागरिक बचाउ महाअभियान’ ले राजधानीको माइतीघर मण्डलामा विरोध प्रदर्शन गर्न लागेका छन् । प्रसाईंलाई पक्राउ गरिएको विरोधमा आज प्रदर्शन गर्न लागिएको हो । साढे ११ बजेदेखि प्रदर्शन थालिने महाअभियानका अभियन्ता आनन्दप्रसाद प्याकुरेलले बताए ।
‘झापा, मोरङ आज ठप्प छ । तीन वटा भारतीय ट्रकमा आगजनी गरिएको छ । सुनसरीमा पनि जनस्तरबाट ठूलो साथ पाएका छौं । अब माइतीघर मण्डलामा आन्दोलन गर्ने तयारी छ । प्रदर्शनमा राष्ट्रवादी अभियन्ताको बृहत सहभागिता रहनेछ’,उनले भने ।
त्यस्तै, हिजो पक्राउ परेका प्रसाईंका समर्थकहरुलाई अहिलेसम्म पनि नछोडिएको उनले बताए । पक्राउ पर्नेमा भीमबहादुर बस्नेत, विष्णुजंग बस्नेतसहित अन्य दुई जना रहेका छन् । साइबर अपराधसम्बन्धी कसूरमा प्रसाईंलाई हिजो भक्तपुरको कमेरोटारस्थित उनकै निवासबाट नेपाल प्रहरीको साइबर ब्युरोले नियन्त्रणमा लिएको थियो ।
काठमाडौं जिल्ला अदालतबाट अनुसन्धानका लागि तीन दिन म्याद थप भएका उनी वीर अस्पतालको इमर्जेन्सीमा भर्ना भएका छन् ।
टिप्पणीहरू