रविको पक्षमा भुवन,जिम्मेवार हुन शुभेच्छुकको आह्वान

नेपाल बैंकर्स संघका पूर्व अध्यक्ष तथा सानिमा बैंकका पूर्व प्रमुख कार्यकारी अधिकृत भुवन दाहाल रवि लामिछानेको पक्षमा खुलेर लागेका छन् । दाहालले सहकारी संस्थाको रकम अपचलन सम्बन्धमा संसदीय समितिले गरेको कारबाही सिफारिस र सरकारले थालेको पहलबारे आपत्ति जनाउँदै सामाजिक सञ्जाल रंगाएका छन् ।

उनले सामाजिक सञ्जालमा लेख्दै घुमाउरो भाषामा रवि लामिछानेका सबै कर्तुत ठीक भन्ने आशय झल्काएको पाइन्छ । लेखेका छन्, ‘रवि लामिछानेजीका कतिपय कमजोरीहरू देखिएका छन् तर सहकारी ठगीसम्बन्धमा गठित संसदीय समितिले कुनै पनि सहकारीबाट उहाँले ऋण लिएको प्रमाण नपाएको र अरू कुनै निकायले पनि त्यस्तो प्रमाण हालसम्म सार्वजनिक गर्न नसकेको अवस्थामा उहाँलाई सहकारी ठगीमा पक्राउ गरी कार्बाही गर्न खोज्नु न्यायसम्मत होला ? सहकारी तथा कम्पनी कानूनका विज्ञहरूको धारणा पढ़न पाए कृतज्ञ हुने थिएँ !’

नबिल बैंकको सामान्य कर्मचारीबाट बैंकिङ क्षेत्रमा प्रवेश गरेर सानिमा बैंकको सिईओ र बैंकर्स संघको अध्यक्षसमेत भएका दाहाल एकाएक रविको पक्षमा किन लागे ? विगतमा करोडौं तलब भत्ता बुझ्ने गरेका दाहाल आवरणमा भने ‘सादगी’ जीवन बिताएको ढोंग देखाउँथे । रविले पनि मुखले गुलिया कुरा गरेर भित्रभित्रै कतिसम्म बेइमानी गर्दथे भन्ने कुरा उनको दुई वटा नागरिकता,दुई वटा पासपोर्ट, सहकारी रकम अपचलनको घटनाले पुष्टि भइसकेको छ ।

‘कतिपय सञ्चालक आफूले रकम दुरुपयोग नगरेता पनि जिम्मेवारीमा बसेर टुलुटुलु हेरेकै कारण कस्टडीमा छन् । अब प्रबन्धक र सञ्चालक भएर पैसा कहाँ गयो मलाई थाहा छैन भन्न कत्तिको मिल्ला ? भोलि बैंकका सञ्चालक र सिइओले यसैगरी बोले भने के गर्ने ?

दाहाललाई जवाफ दिँदै सामाजिक सञ्जालमा कुलराज चालिसे लेख्छन्, ‘आयोगको प्रतिवेदन कार्यान्वयनभन्दा अन्य कुनै कारणले हुन पनि त सक्छ । हराएको सर्भर छविलालजीको घरबाट प्राप्त भएको र पोखरा प्रहरीले पूरक अनुसन्धान प्रारम्भ गरेको भन्ने खवर पनि त छ । पशुपति कोटीहोमका पण्डितको पारा पनि त हुनसक्छ ।’ त्यस्तै जनकराज शाहले दाहाललाई नेक्सस मिलाएर संगठित ठगी भएको र यस्तो हर्कत एउटाको दिमागले गर्न नसक्ने जवाफ दिएका छन् ।

सहकारी ठगीको पीडा पीडितहरुलाई मात्र राम्रोसँग थाहा भएको रोमनाथ ज्ञवालीको जवाफ छ । सहकारीको रकम कुन हद पार गरेर ठगिएको छ भन्ने कुरा जान्न उनले सुझाएका छन् । लेखिएको छ, ‘कतिपय सञ्चालक आफूले रकम दुरुपयोग नगरेता पनि जिम्मेवारीमा बसेर टुलुटुलु हेरेकै कारण कस्टडीमा छन् । अब प्रबन्धक र सञ्चालक भएर पैसा कहाँ गयो मलाई थाहा छैन भन्न कत्तिको मिल्ला ? भोलि बैंकका सञ्चालक र सिइओले यसैगरी बोले भने के गर्ने ? जिम्मेवार नागरिकले बुझ्नु पर्ने कुरा ..।’