‘रेड जोन’मा नाइट बस सञ्चालन नहुने, दुई दिन धान नकाट्न सल्लाह

राष्ट्रिय विपद् जोखिम न्यूनीकरण तथा व्यवस्थापन प्राधिकरणले ‘रेड जोन’ मा परेका जिल्लामा रात्रिकालिन बस नचलाउन आग्रह गरेको छ । 

प्राधिकरणले आज विज्ञप्ति जारी गर्दै बाढीपहिरोको उच्च जोखिममा रहेका हिमाल तथा पहाडका ५६ जिल्लामा भोलि र पर्सि रात्रिकालिन बस नचलाउन भनेको हो । जल तथा मौसम विज्ञान विभागले बिहीबारदेखि आइतबारसम्म भारी वर्षा हुने पूर्वानुमान गरेको छ । जसका कारण अति प्रभावित हुने सम्भावना रहेका जिल्लालाई रेड जोन घोषणा गरिएको छ । 

झापा, सुनसरी, धनकुटा, तेह्रथुम, खोटाङ, ओखलढुंगा, उदयपुर, भोजपुर, इलाम, पाँचथर, मोरङ, सिरहा, सप्तरी, पर्सा, मकवानपुर, चितवन, धादिङ, नुवाकोट, रसुवा, काठमाडौं, भक्तपुर, ललितपुर, काभ्रेपलाञ्चोक, सिन्धुपलाञ्चोक, सिन्धुली, रामेछापमा रातको समयमा बस चलाउन रोक लगाइएको छ । 

त्यस्तै, म्याग्दी, बाग्लुङ, तनहुँ, स्याङ्जा, नवलपरासी पूर्व, कास्की, पर्वत, लमजुङ, गोरखा, मनाङ, रुकुम पूर्व, रोल्पा, गुल्मी, प्युठान, अर्घाखाँची, पाल्पा, दाङ, कपिलवस्तु, रुपन्देही, नवलपरासी पश्चिम, बाँके, बर्दिया, जाजरकोट, रुकुम पश्चिम, दैलेख, सुर्खेत, सल्यान, डोटी, कैलाली र अछाममा समेत बस नचलाउन प्राधिकरणको निर्देशन छ । 

प्राधिकरणले आइतबारसम्म धान नकाट्न वा काटिसकेको भएमा तत्काल थन्काउन पनि अनुरोध गरेको छ । तराई तथा मधेश क्षेत्रमा सकेसम्म भुइँतलामा अन्नपात नराख्न, पहिरोको जोखिम भएका स्थान र नदी किनारका बस्तीलाई उच्च सतर्कता अपनाउन पनि भनिएको छ ।

 

दाउरा निकाल्ने तथा माछा मार्ने कामका निम्ति नदी किनारमा नजान तथा सो अवधिभर अत्यन्त जरुरी अवस्थामा बाहेक यात्रा नगर्न पनि प्राधिकरणको अनुरोध छ । बादल गर्जेको र चट्याङ परिरहेको बेला रुखमुनि, बलेनीमा बस्न तथा घरबाहिर ननिस्कन समेत विज्ञप्तिमा उल्लेख छ । 

प्राधिकरणले पूर्वतयारी र प्रतिकार्य गर्ने साझेदार संस्थाहरु जिल्ला विपद् व्यवस्थापन समिति र स्थानीय विपद् व्यवस्थापन समितिसँग समन्वयमा रही ‘अर्लट’ रहन ध्यानाकर्षण गराउँदै खोज तथा उद्दारका लागि तीन वटै सुरक्षा निकाय एंव स्वंयसेवकहरु तयारी अवस्थामा हुन पनि निर्देशन दिएको छ । साथै, विपद्को जोखिममा रहेका नागरिकलाई तत्काल सुरक्षित आश्रमस्थलमा सार्न निर्देश गरिएको छ ।