क्वाङ्सीमा हस्तान्तरित झण्डासहित पत्रकार टोली पेइहाईमा

चीनको क्वाङ्सी च्वाङ प्रान्तीय राजधानी नानिङ स्वायत्त क्षेत्र पुगेका विदेशी पत्रकारहरुको टोलीलाई भ्रमण अवधिका लागि झण्डा हस्तान्तरण गरिएको छ । ‘चीनमा अवसर: चित्ताकर्षक क्वाङ्सी’ कार्यक्रमअन्तर्गत विशेष महत्वका स्थानको अवलोकन भ्रमणक्रममा चिनियाँ कम्युनिष्ट पार्टीका प्रान्तीय प्रचार विभाग उपप्रमुख तथा सूचना कार्यालय निर्देशक लि पानले झण्डा हस्तान्तरणसङ्गै कार्यक्रम शुभारम्भ गर्नुभएको छ । 

चार दिने अवलोकन भ्रमणमा चीनसहित नेपाल,कजाखस्तान, रुस,इटाली,थाइल्याण्ड, मलेसियालगायत मुलुकका डेढ दर्जन पत्रकार सँलग्न छन् । हिजो बिहान आयोजित समारोहमा बोल्दै निर्देशक लिले क्वाङ्सी प्रान्तले हासिल गरेका दिगो तथा हरित विकासले समग्र जलवायुमा सकारात्मक प्रभाव पारेको उल्लेख गर्नुभयो । उहाँले भन्नुभयो, ‘चीनमा लगानीको प्रचुर सम्भावना छ । यसले अवसरलाई बढाएको छ । त्यस्तो अवसर क्वाङ्सीमा पनि प्रशस्त रहेको अवस्थालाई प्रत्यक्ष रुपमा अनुभव गर्नुहोला । "

कार्यक्रममा ‘मिडिया एण्ड ओभरसिज:जेड जेनेरेसन’ माथि इटाली र मलेसियाका सहभागीहरुले प्रकाश पारेका थिए । कार्यक्रम शुभारम्भको झण्डा कजाखस्तानका पत्रकार तथा त्यहाँको औद्योगिक समाचार पत्रका प्रधान सम्पादक सेरिक कोरजुम्बायेभलाई हस्तान्तरण गरिएको थियो ।

टोलीले दिउँसो छिन्चौ शहर र पेइपु गल्फ पोर्ट (बन्दरगाह) भ्रमण गरेको छ । छिन्चौमा निर्माणाधीन चार करोड २८ लाख चिनियाँ युआन बजेटको छिङनियान जल बृहत परियोजना अवलोकन गराइएको छ । परियोजना सम्बद्ध अधिकारीहरुले चीनले दीर्घकालीन जैविकमैत्री आयोजनालाई ध्यानमा राखेर बनाइएका मेघा परियोजनामध्ये छिङनान पनि एक भएको बताएका छन् । समुन्द्रसँग जोडिएको उक्त परियोजना पूर्ण भएपछि नहर भएर पानी जहाज सजिलैसँग शहर नजिकैसम्म आइपुग्ने,डल्फिनसमेत नहरमा पौडिनसक्ने उपयुक्त ढोका बनाइएको छ । उक्त परियोजनास्थलको भित्तामा चिनियाँ कम्युनिष्ट पार्टीको विशाल झण्डा राखिएको छ ।

त्यस्तै छिन्चौ शहरको अत्याधुनिक बेइपु गल्फ पोर्ट (बन्दरगाह) को बारेमा पनि पत्रकारहरुलाई जानकारी दिइएको छ । सियामनपछि उक्त बन्दरगाह मानवरहित प्रणालीबाट सामान लोड तथा अनलोड गर्ने अटोमेटिक सिस्टम अपनाएको पाँचौं हो । राष्ट्रपति सि जिनपिङले अघिल्लो वर्ष गर्नुभएको बन्दरगाह टर्मिनलमा अत्याधुनिक प्रविधि प्रयोगको अवलोकनले सबैमा ऊर्जा थपिएको भनी कार्यालयको मूलद्वारमा फोटोसँगै लेखिएको छ ।

 

उक्त बन्दरगाहको अत्याधुनिक प्रविधि प्रयोगमा हालसम्म छ करोड ४२ लाख युआन खर्च भइसकेको छ । उच्च प्रविधिमध्ये करिब ९५ प्रतिशत चीनमा नै बनेका हुन् । 

साँझ प्रख्यात समुन्द्री शहर पेइहाइको पार्टी नगर कमिटीका प्रमुख तथा नगर स्थायी समिति सदस्य चङ तिङसोङले स्वदेशी तथा विदेशी मिडियाकर्मीहरुको सम्मानमा रात्रिभोजको आयोजना गर्नुभएको थियो । कमिटीका उपप्रमुख सु युआनसिन र २१ औं शताब्दी च्यानलका प्रमुख सम्पादक थिआन वेनसहितको उपस्थितिमा प्रमुख चङले सुन्दर पर्यटकीय नगर पेइहाईमा पाहुना टोलीलाई स्वागत गर्नुभयो । 

पेइहाई दक्षिणी चीनको प्रमुख सामुन्द्रिक किनारको पर्यटकीय नगरका साथै परापूर्वकालमा सिल्करोडको प्रमुख बन्दरगाह शहर पनि हो । चीनको पहिलो लटमा खुलेका सामुन्द्रिक तटीय शहरहरुमध्येको एक रहेको पेइहाईलाई चीनमा ऐतिहासिक र सांस्कृतिक शहरको रुपमा लिइन्छ ।