बमको हल्लापछि नयाँ दिल्ली उड्न लागेका यात्रु आइसोलेसनमा

एअर इण्डियाको काठमाडौंबाट नयाँ दिल्लीतर्फ उड्न लागेको विमानमा बम राखिएको हल्लापछि एक सय ६० जना यात्रुलाई विमानबाट झारिएको छ । आज दिउँसो पौने ४ बजे उड्न ठिक्क परेको एआई २१५ उडान नम्बरको विमानमा बम रहेको जानकारी इमेलबाट दिइएको थियो । 

एयर इण्डियाको कार्यालयले त्रिभुवन अन्तर्राष्ट्रिय विमानस्थललाई साढे ४ बजे उक्त जानकारी दिएपछि दिल्ली प्रस्थानको लागि विमानमा चढिसकेका ती यात्रुलाई छुट्टै आइसोलेसनमा राखिएको बताइन्छ । त्यसपछि विमान र यात्रुको ब्यागेजलाई नेपाली सेनाको सुरक्षा टोलीले पुनः चेक जाँच गरेको थियो । 

यात्रुलाई पनि दोहोर्याएर सुरक्षा जाँच गरेपछि साँझ उक्त विमान नयाँ दिल्ली उडेको हो । दुई साताअघि नयाँ दिल्लीबाट आएको एअर इण्डियाको विमानमा बम रहेको ह्वाट्सअप मेसेजपछि त्रिभुवन अन्तर्राष्ट्रिय विमानस्थलमा सुरक्षित अवतरण गराएर आवश्यक चेक जाँच गराइएको थियो ।