युरोप पुगेका सुरेश सात महिनादेखि बेपत्ता

वैदेशिक रोजगारीको क्रममा युरोपेली मुलुक पोर्चुगल पुगेका एक नेपाली सम्पर्कविहीन भएका छन् । 

कैलालीको धनगढी स्थायी ठेगाना भएका सुरेशकुमार ओझा सात महिनादेखि उतै बेपत्ता भएका हुन् । पोर्चुगलको लिस्बनबाट हराएका उनको खोजीका लागि धनगढी उपमहानगरपालिकाका मेयर गोपाल हमालले आग्रह गरेका छन् । 

गैरआवासीय नेपाली सुरज विष्टसँग होस्टलमा बस्दै आएका ओझा सात महिनाअघि त्यहाँबाट निस्केको र हालसम्म कतै सम्पर्कमा नआएको जनाइएको छ । 

मेयर हमालले फेसबुकमा लेखेका छन्, ‘धनगढी स्थायी बसोबास भएका सुरेशकुमार ओझा पोर्चुगलको लिस्बनबाट हराउनुभएको छ । उहाँ पोर्चुगलमा एक जना एनआरएन सुरज विष्टसँग होस्टलमा बस्नुभएको थियो । सुरेशकुमार ओझा सात महिनाअघि होस्टलबाट नै भागेपछि सम्पर्कमा आउनुभएको छैन । उहाँलाई परिवार र पोर्चुगलमा भएका उहाँका मित्रहरुले खोज्दै हुनुहुन्छ ।’

उनी हालसम्म फेला नपरेकाले कँही कतै कसैले भेटेमा वा देखेमा सुरज विष्टलाई ३५१९२४३६५७३६ मा सम्पर्क गर्न अनुरोध गरिएको छ ।