युवा झाँक्री सवार गाडीको ठक्करबाट दुईजना घाइते

काठमाडौंको शंखरापुर नगरपालिका–९, इन्द्रायणीमा सवारी दुर्घटना भएको छ । शंखरापुर नगरपालिका र कागेश्वरी मनोहरा नगरपालिका जोड्ने पुलनजिकै केही बेरअघि सवारी दुर्घटना भएको बताइएको छ । 

प्रकाश मानव सेवा सांस्कृतिक झाँक्री केन्द्रका प्रमुखसमेत रहेका युवा झाँक्री प्रकाश भुजेलको टोयोटा ल्याण्ड क्रुजरले मोटरसाइकललाई ठक्कर दिएको वडाध्यक्ष सहदेव श्रेष्ठले बताए । उनका अनुसार दुई जना घाइते भएका छन् । 

उक्त गाडी अनियन्त्रित भई पसलभित्र छिरेको हो । ‘उहाँ सवाररत गाडी अनियन्त्रित भई दुर्घटना भएको हो । घटनामा घाइते दुई जनालाई अस्पताल लगिएको छ । गाडी पसलभित्रै छिरेको छ । घटनास्थलमा ठूलो संख्यामा प्रहरी परिचालन गरिएको छ’,उनले भने । 

घटनास्थलमा प्रहरी वृत्त, साँखु र प्रहरी वृत्त, बौद्धबाट टोली खटिएको छ ।