मुद्दा हालेर चर्चा कमाएका युवराज अब म्युजिक भिडियोमा

सर्वोच्च अदालतमा रिट हालेर रवि लामिछानेको तत्कालिन सांसद र मन्त्री पद खुस्काइदिएपछि एकाएक चर्चामा आएका सिन्धुलीका युवराज सफल नयाँ अवतारमा देखिएका छन् । 

सार्वजनिक सरोकारका विषयमा मुद्दा हाल्ने र निवेदन लिएर सरकारी अड्डामा धाउने उनी पछिल्लो पटक मोडलका रुपमा देखा परेका हुन् । सफलले अभिनय गरेको पहिलो म्युजिक भिडियो हिजो युट्युबमा रिजिल भएको छ । 

‘म त ज्यूँदै मरेकी छु’ बोलको गीतमा उनको मोडलिङ रहेको छ । भिडियोमा अभिनेत्री नम्रता सापकोटाले साथ दिएकी छन् । गीतमा नम्रता श्रीमानबाट धोका पाएकी पत्नीको भूमिकामा छिन् भने सफल उनलाई सहारा र सान्त्वना दिइरहेको देखिन्छन् । 

भिडियोको अन्त्यमा सफलको डाइलग छ, ‘अब म ज्वाईँलाई मुद्दा हाल्दिन्छु ।’ गीतका शब्दहरु पनि उनैले लेखेका हुन् । 

अनुपजंग थापा नामको युट्युब च्यानलमार्फत सार्वजनिक भएको उक्त गीतमा गायिका निरा रानाभाटको एकल आवाज छ । गीत सार्वजनिक भएपछि सफलको अभियनलाई लिएर सामाजिक सञ्जालमा ट्रोलसमेत गरिएको छ ।