‘तिम्रो प्रीत’ले गीतकार अधिकारीको चर्चा

तिम्रो प्रीत यस्तो लाग्छ, जीवनको दियो जस्तो
मुस्कान सधैँ लाग्छ, इश्वरको बरदान जस्तो !

नेपाली सांगीतिक क्षेत्रमा यतिबेला व्यापक प्रशंसा बटुलिरहेको ‘तिम्रो प्रीत’ गीतका पंक्ति हुन्, यी । वरिष्ठ गीतकार युवराज अधिकारीको शब्द रचना रहेको गीत प्रेम दिवसको अवसर पारेर फागुन २ गते सार्वजनिक भएको थियो । 

सुरजकुमार थापाको स्वर तथा संगीत रहेको गीतले केही दिनयता युट्युब, फेसबुक र टिकटिकजस्ता डिजिटल प्ल्याटफर्ममा राम्रो चर्चा पाइरहेको छ । गीतका शब्द र संगीत संयोजनलाई धेरे दर्शक/स्रोताले मन पराएको देखिन्छ । 

सञ्जाल प्रयोगकर्ता रोहित ओलीको प्रतिक्रिया छ, ‘धेरै राम्रो गीत ।' अरविन्द कमातीले पनि प्रशंसा गर्दै लेखेका छन्, ‘शब्द र संगीतको वर्णन गर्न गाह्रो भयो मलाई’ । पर्शुराम केसीले चाहिँ 'तबलाको धुनले छोएको’ बताएका छन् । गायक सुरजकुमार थापा र निहारिका थापाको अभिनय रहेको गीतको भिडियोले पनि तारिफ पाएको छ। 

स्मरण रहोस्, वरिष्ठ गीतकार अधिकारी लामो समयदेखि आधुनिक संगीतमा सक्रिय छन् । दीप श्रेष्ठले स्वर दिएको ‘बिहानीको शीत टेकेर’, रामकृष्ण ढकालले गायको ‘आकाशको माथि माथि’, कुवेर राईको ‘विश्वास गर’ जस्ता लोकप्रिय गीत उनले नै लेखेका हुन् ।

अधिकारीको शब्दमा गायक प्रमोद खरेल र स्वरुपराज आचार्यले पनि स्वर दिइसकेका छन् ।